Shillong, Nailar 28 : Ki nongialam jong ki ar tylli ki Regional Committee na ka bynta ka West Khasi Hills, kata, na ka Jylla Meghalaya ba la khlieh da u Bah Paul Lyngdoh kum u Chairman bad na ka Jylla Assam ba la lamkhmat da u Chandra Mohan Patowary ki la shim ia ka rai ban sa leit sorjanmin ia ki jaka kiba don hapdeng ha ka jingiakajia pud ha ka thain West Khasi Hills hadien ba la kut ka Dorbar Lyiur jong ka Jylla Meghalaya bad ka Jylla Assam.
U Bah PauL Lyngdoh ha ka jingiakren bad ki lad pathai khubor hadien ba la wai ka jingialang jong ka Regional Committee kaba la long ha nongbah Shillong ha ka lah sngi U Blei u la ong, “ki Regional Committees na ka bynta ka West Khasi Hills-Kamrup Border Sector ki la rai ban pynduna ia ki jingeh jong ki shnong kum shi bynta ka jingiapynbeit ia u pud u sam ha kane ka Sector.”
Ka jingialang ka long ban pyniakhlad la ka jong ia ki shnong ki bym don ka jingiakajia pud bad ki shnong kiba don ha ka jingiakajia pud.
Haba ki lad pathai khubor ki la pyrshang ban kylli bniah halor ki shnong, na ka liang jong kine ki arngut ki nongialam ka Committee ki la kyntait ban iathuh bniah.
U la ong ki Deputy Commissioners bad ki MDC ynda la pyndep ia ka jingbishar kaba pura kin sa synran lang ia ki dkhot jong ka Committee ban leit jngoh ia ki shnong hadien ba la kut ka Dorbar Lyiur ha kaba kut jong u Nailur mynta u snem.
U Chairman jong ka Kamrup District Border Sector u Chandra Mohan Patowary u la ong, dei tang da ka jingiakren sngewthuh jingmut yn sa lah ban iapynbeit ia ki jingiakajia ha Langpih Sector.
