Shillong, Lber, 16: Tang hapoh khyndiat kynta ba ka Election Commisssion of India (ECI) ka la pynbna ia ka tarik ba pynlong ia ka elekshon Lok Sabha, u District Election Officer jong ka East Khasi Hills District u la pynjari da ka Section 144 CrPC ban mana ia kino kino ki briew ne ki kynhun ban rah pisa palat 50 hajar tyngka shaneng hapoh u pud u sam jong ka East Khasi Hills District.
Katkum kane ka hukum, u DEO u la ong, “la ioh jingtip ba ki don katto katne ki briew kiba rah bun bha ka pisa ban thied ia ki nongthep vote ba kin ai ia ka vote bakordor jong ki sha u kyrtong. Lada ailad kum ia kine ki jait kam, kan ktah ia ka jingiaid beit bad ka jingkhuid jingsuba ka elekshon Lok Sabha 2024 bad ka lah ban pynmih ia ka jingiakajia, ka jingiashoh iadat hapdeng ki paidbah, kaba lam sha ka jingthud jong ka shongsuk shongssain, ka jingduh ei ki mynsiem briew bad ki mar ki mata.”
U DEO u la mana ruh ban pynlong ia ki jingiakhih kum ki jingshah thngan, ki proseshon, ki rally bad kiwei kiwei yn sa pynlong da ki katto katne ki kynhun bapher bapher hapoh ka district.
La mana ban dro ha ki kynroh, ban tah poster ne kot kino kino ki jingthoh ba pynjah burom, ban pynieng ia ki cut-out, hoarding, banners ha ki jaka paidbah ne ha ki phyllaw ing jong ki paidbah khlem da ioh jingbit na ki trai iing bad ka jingioh jingmynjur na ka ophis u Deputy Commissoner.
La mana ia ki seng sainpyrthei ne kyrtong ban buh ia ki banner ha surok ne ki jaka rung.
La mana ban pynlong ia ki jingialang khlem da ioh jingbit na ka ophis u Deputy Commissoner bad na ki Rangbah Shnong. La mana ban pyndonkam ia ki tiar jingpynsawa hapdeng ka por 10:00 baje mynmiet haduh 6:00 baje mynstep.
Lada pyndonkam ia ki PA System/Loud Speaker khlem da ioh jingbit yn kurup noh mardor da ki bor synshar district.
Yn ym shah ban pynlong ia ki proseshon bad ki rally khlem da ioh jingbit.
Kane ka hukum kan treikam noh mardor tad haduh ban da kut ka jingpynlong ia ka elekshon.
