Shillong, Rymphang, 26: Ki surok thymmai kiba pynïasoh sha ka shnong Nongkhlaw, West Khasi Hills District ia kiba la mang pisa da ka sorkar Jylla ban pyntrei na ka bynta ban pynkhreh ïa ka jingiaseng Samla Synod Sepngi hapoh ka shnong Nongkhlaw ha u snem 2023 ki la shu sah khongreng bad khlem don ba pyntrei shuh ia ki hadien ba la kut ka jingiaseng Synod.
Ïa kane la lap da ka Fedearation of Khasi Jaiñtia & Garo People, Lai Lyngdoh Area Unit ha ka jingleit jurip ha ka Lah Sngi U Blei ha ryngkat ka jingïdonlang jong ki dkhot ka FKJGP Nongstoiñ Circle bad ki nongïalam shnong bad kane ka jingsah khongreng jong kine ki surok ka la pyndiaw bad pynlynngoh ïa kiba bun.
Ki nongïalam ka FKJGP ha ka jingiakren bad ki lad pathai khubor ki la ïathuh ba katkum ka jubab RTI kine ki don baroh haduh 6.335 kilomitar ha kaba ka jingsiangrong ka dang long tang 2 kilomkitar katba kaba dang sah ka long sa 4.335 kilomitar kaba la shu sah khongreng khlem pat da siangrong satia haduh mynta.
Kumta na ka liang jong ka Seng ka la kyntu ia ki bor ba dei peit khamtam eh ïa ka tnad PWD ba kan phah trei pyndep noh mardor ïa baroh ki Contractor ki bym pat pyndep bad ka seng ka la dawa ruh ban pyndep hapoh u Lber mynta u snem hynrei lym kumta ka seng kam banse ban hap shim da kiwei pat ki sienjam ba tyngeh.
