Shillong, Nailar, 19: Da kaba buh hakhmat ïa ka thong ban pynsuk ïa ki paidbah ban poi kham kloi sha ki jaka ba ki thmu ban leit namar ka jingdheng kali kaba shyrkhei ha nongbah Shillong, ka JETS24x7, ïa kaba la seng da ki katto katne ngut ki samla Khasi ha ka sngi Saitjaiñ ka la pyllait paidbah ïa ki thuk thuk ar shaka (e-scooty) ban kamai da kaba pyndonkam ïa u Mobile App.
Ïa ki e-scooty bad e-Auto la kaweh lama da ka Editor jong ka Kotkhubor The Shillong Times, ka Padmashree Kong Patricia Mukhim kaba la long ka Kongsan ryngkat ka jingdon lang jong u President ka Shillong Press Club (SPC) u Bah David Laitphlang, u Managing Director ka JETS24x7 u samla Pynskhemlang Uriah bad kiwei kiwei kiba la shah khot sngewbha.
Ka Kong Patricia Mukhim haba kren kum ka Kongsan shwa ban pyllait ïa u Mobile App bad kaweh lama ka la ong, “nga dei ka briew kaba nyngkong eh ba ngan phaikhmat ïa kum kine ki jingai jingshakri. Haba ngi leit jingleit shabar bad haba ngi slem ban leit phai sha la ka jaka sah ngi shu khot ïa ki Uber ne Ola ngi la ïoh. Hynrei balei keiñ ngim ïoh ïa kano kano ka kam Aggregator hangne (ha Meghalaya) ba ngin suk ma ngi ki paidbah khnang ba kan ïarap ha baroh ar liang. Kine (JETS24x7) kin ïoh kamai bad ngi ruh ngin ïoh ka jingsuk bad ka don ka ruh ka jingshngaiñ lada don kine ki thuk thuk ar shaka.”
Ka la pynshlur ruh ïa ki nongpynïaid jong ka JETS24x7 ban ïakren bad ki bor Sorkar haba pyntyllun ïa kane ka jingai jingshakri sha ki paidbah.
“Ka Sorkar ka dei ban shakri ïa u paidbah. Kam dei kaei kaei kaba ngi hap ban leit nguh leit dem. Ngi hap pyni ha ki (Sorkar) ba ngin leh ïa ka bussiness. Phi dei ban don ïa ka jingtyrwa kaba biang. Ka Bussiness Model kaba biang, ka Revenue Model kaba biang. Ynda la biang lut nadong shadong balei kin pynjynjar ïa phi,” la ong ka Kong Patricia.
Haba kyntu ïa kane ki samla kiba pynïaid ïa kane ka shlem ai jingshakri, ka Kong Patricia ka la bynrap, “phi dei ban don ruh hakhmat ïa ka thong bad kaba kongsan ka long ka jingtrei shitom. Kane ka jingim kaba mynta kam dei shuh ka jingim kaba suk kum mynshwa. Mynshwa ki wan wad na ing ban ai kam, hynrei mynta ka la poi ka jingeh. Ngi ïohsngew ruh ba u Myntri Rangbah u ong ba ngim lah shuh ban ai kam, ka Sorkar kam lah shuh ban seng kam. Kaba ngi lah mynta ka long ba ngin trei da lade na ka bynta ïalade.”
“Ngi sngewkmen ba phi don ïa kane ka jingthmu bad ka thong ban long Aggregator kaba nyngkong eh ha Meghalaya. Nalor ka jingïakhun bad kiwei pat ka dei ban don ruh ka jingsngewthuh kaba jylliew ha ka rukom pynïaid ïa ka bussiness,’ la ong shuh shuh ka Kong Patricia.
“Ngi kum ki nongthoh khubor ngi long kiba kloi ban kyrshan ïa phi ha kiei kiei kiba bha kiba phi pyrshang ban leh. Ngi kwah ban iohi ba ki samla kin trei ïa ka kam hynrei ym ban shu leit dawa pisa na manla ki dukan, na ki kontraktor namar kane ka jingleh kan pynhiar dor ïa ka jaitbynriew jong ngi bad ïa ka Jylla jong ngi. Lada ngi trei minot, U Blei ruh Un kyrkhu, ka spah ruh kan wan hi,” la ai mynsiem shuh shuh ka Kong Patricia.
U Managing Director, samla Pynskhemlang u la ïathuh ba ïa ka JETS24x7 kaba la bsut ruh ïa ka tien phira, “kyntiew ïa la ki jong” ka dei kaba la sdang ha u Ïaiong, 2022. “Ban poi haduh kane ka khyllipmat, ka la shim por ïa ngi haduh shisnem tam. Ka jingmih jong ka JETS24x7 ka dei na ka daw ka jingbym ïohkam ïohjam,” la ong une u samla.
“Kum ki samla haba ngi peit ïa ka jylla kaba la ïaid lynti la 51 snem hynrei haduh mynta ngim pat don ka Aggregator na kane ka Jylla. Kum ka kynhun ngi la ïatrei shitom, miet la bad sngi bad nga sngewkmen lyngba ka jingïatreilang ngi la lah ban pynurlong ïa kane ka jingthmu,” u la ong.
“Ngi kyrmen skhem ba kane ka jingshakri kaba ngi ai kan long ka jingïohnong ïa ki paidbah, ïa kiba donkam ïa kane ka jingshakri. Katba ngi lah ngin ai ïa ka dor kaba pynhun ïa ki nongpyndonkam. Da ka jingkyrshan jong ki nongshong shnong ka Jylla ngin dup lah ban pyntyllun ïa kane ka jingshakri ha ki snem ki ban nang tyllun nangne shakhmat,” u la bynrap.
Da kaba pynpaw ïa ki jingshah tynjuh kiba ap hakhmat namar ka jingdon jong ki Kompeni kiba nabar ka jylla kiba la ïaid kham shakhmat ha ka jingpyndonkam ïa ka teknoloji, u samla Uriah u la ong, “ngi donkam ïa ka jingkyrshan lem jong ki paidbah ba ngin dup lah ban ïaineh ha kane ka kam namarba ki bun ki kompeni kiba nabar ka jylla kiba la kham kiew shakhmat ha ka jingpyndonkam ïa ka teknoloji bad kiba la kham ïar ka jingshakri da ki snem ki snem.”
U la ïathuh ba ym slem shuh ka JETS24x7 kan sa pyllait paidbah sa ïa ki Scooty bad ki Auto Rickshaw kiba ïaid da ka petrol ban kham pynjanai shuh shuh ïa ka jingshakri.
