Shillong, Jymmang, 15: U District Magistrate jong ka East Khasi Hills District u SC Sadhu ha ka sngi Balang u la pynjari da ka Section 144 CrPC ha East Khasi Hills District baroh kawei ban mana ia kino kino kiba buh ia ki khyrdop khrong pisa.
Katkum kane ka hukum, u District Magistrate u la iathuh ba u la ioh jingtip ba ki don ki trok kit mawshun kiba iaid na Umdud sha surok Zero Point, kaba dei ka surok kaba mih sha Majai Land Custom Stations (LCS), kiba la shah pynsangeh ha ki nongshong shnong ka Majai. Ki nongkhaii ki la mynjur ban sangeh shipor ia ka jingiaid jong ki trok tad haduh ban da iapynbeit da kumwei pat hapdeng ki ar kynhun, kata, ka Dorbar Shnong Majai bad u Syiem jong ka Hima Sohra.
“Ka don ka jingkhrong pisa beain lyngba ka khyrdop jong u Syiem ka Hima Sohra na ki trok kit mawshun kiba iaid lyngba ia ka Majai Land Custom Station ha ka dor T. 400 na kawei ka trok bad kane ka la lam sha ka jingmih ka jingiakulmar. Ka Sorkar Meghalaya ka la ieng ha ka nongrim ban wanrah ia ka “Zero Tolerance” Policy pyrshah ia ka jingkhrong pisa beain da ki Toll/Check Gate ne ban khrong pisa jubor na ki trok kiba iaid lyngba ki surokbah National Highways, ki surok State Highways bad ki Major District Roads jong ka East Khasi Hills,” la pyntip u Sadhu.
“Ka jingpynieng ia kine ki Toll/Check Gate beain bad ia ki jingker ban khrong pisa jubor ka la pynwit ia ka leit ka wan bad ka la wanrah ia ka jingbym suk jong ki nongiaid lynti bad ka lah ruh ban wanrah ia ka jingjia aksiden ha surok. Namarkata, ban khanglad ia kano kano ka jingkulmar kaba lah ban mih, la mana tyngeh ban buh ia ki khyrdop khrong pisa (Toll/Check Gate) bym shym la ioh jingbit bad ban khrong pisa jubor ha shilynter ki surokbah National Highway, ki surok State Highway bad ki Major District Road jong ka East Khasi Hills,” la mana u District Magistrate
“Kino kino kiba pynkheiñ ia kane ka hukum kin shah pynshitom katkum ki kyndon jong ka aiñ. Namar ka jingkyrkieh jong ka kam, ia ka hukum la pyntreikam noh mardor tad haduh ban da pynbna da kumwei pat,” la pyntip u Sadhu.
