Nongstoiñ, Jymmang, 15: Ka Hynñiewtrep Youths Council (HYC) Ri Mulliang Circle, hadien ba ka la lap ba ki don ki bar jylla kiba die pathar ïa ki dawai ha ka thaiñ Tynghor bad ha kiwei de ki shnong bamarjan kiba don ha ki thaiñ khappud ka la pynlong ïa ka seng ban sngew artatien ba ïoh lehse u drok un ïoh ban rung laitlain ha kane ka thaiñ.
Halor kane ka bynta, ka Seng ba la lamkhmat da u President jong ka HYC Ri Muliang Circle u samla Disterborlin Wanniang ryngkat ka jingsynran lang da u President ka HYC West Khasi Hills District Unit u samla Lumlang Kharsyiemlieh ha ka sngi Balang ki la leit ban ïakynduh ïa ka District Medical & Health Officer (DM&HO) jong ka West Khasi Hills District ban ïakren halor ka jingdie dawai pathar ki bar Jylla ha ka thaiñ Tynghor, Langja, Langpih bad ha kiwei de ki shnong kiba don ha khappud jong ka West Khasi Hills District.
Ka seng ka la kyntu ia ka DM&HO ba kan shimkhia halor kane ka long nalor ka jingdon jong ki bar Jylla kiba die dawai pathar, ki la don ruh sa ki nongdie jingbam kiba shu thad madan bad die pathar bad kane ka lah ban buh jingma ïa ka koit ka khiah jong ki paidbah.
