Shillong, Nailur, 02: Ka Employment Monitoring Cell jong ka Khasi Students’ Union (KSU) ha ka Lah Sngi u Blei ka la ïakynduh ïa ka District Medical & Health Officer (DMHO) jong ka East Khasi Hills District ban ujor bad ban pan jingpynshai halor ka jingkynrum kynram ka jingpynlong eksamin thung kam ha ka district na bynta ka AYUSH Hospital kaba hap hapoh ka National Ayush Mission (NAM).
Ha u kyrwoh ba la phah da u Chairman jong ka Employment Monitoring Cell ka KSU u samla Reuben Najiar la ïathuh ba ka District Ayush Society (DAS) ka la pylait paidbah ïa ki post bapher bapher ha 13 tarik, Rymphang, 2024. Hadien ba ki samla ka jylla ki ladep aplai ïa kine ki post bapher bapher, la pynlong ïa ki eksamin naduh u Jymmang bad ïa ki result la pynmih ha kine ki khyndiat sngi.
“Ka Seng ka dap da ka jinglynngoh ban ïohi ïa ka result jong ka District Programme Manager (DPM). Na ka bynta ka post District Programme Manager (DPM) ha East Khasi Hills la pynlait tang kawei ka post bad ki don arphew ngut kiba la aplai bad tang kine ki 20 ngut hi kiba la shah jied ban thoh ïa ka eksamin ba la pynlong ha 29 tarik, Jylliew, 2024 katkum ka jingpynbna (Notification) ba la pyllait na ka ophis DHMO. Hynrei ha ka por ba la pynmih ïa ka result jong kane ka eksamin la lap ba na ki san ngut kiba lah pas ïa ka eksamin (written examination) ban ïaleh ïa ka Document Verification ne ka Personal Interview, ki don ar ngut na ki san ki bym shym lah mih kyrteng hapdeng ki 20 ngut ba la pyllait katkum ka jingpynbna na ka ophis DMHO. Kane ka pynsuba ïa ka seng bad ïa ki paidbah baroh ba ka don eiei sha lyndet ba la mih pynban da ka kyrteng jong ki briew ki bym shim la aplai ïa ka kam, ki bym shym la don kyrteng ha ka thup jong ki 20 ngut, hynrei ki la paw kyrteng pat ban ïaleh ïa ka document verification,” la ong u kyrwoh na ka seng.
Ka Seng ka la pan jingpynshai na ka DMHO kaba dei ruh ka Member Secretary hapoh ka District Ayush Society, EKH.
Ka DMHO ka la pyntip ba la thung ïa u Nodal Officer ba kyrpang ban peit halor ka jingthung kam bad ka jingleh eksamin bad ong ruh ba kam don satia ïa ka jingtip kaba bniah halor kane ka bynta hynrei ka la kular pat ba kan tih bniah halor kane ka bynta bad yn sa pyntip bad yn sa ai jingpynshai sha ka Seng ha ka sngi Baar.
“Ka Seng ka ju lap na ka por sha ka por ïa kum kine ki jingthurmur ha ki jingthung kam ha ki post bapher bapher. Ka jingsuba na ka liang ki paidbah ha kine ki sngi ki long ka jingthung kam hapoh ka jylla kam shym la long satia kaba khuid hynrei ka long tang na bynta ki khun ki kti ki longheh longhaiñ,” la kynthoh ka KSU bad bynrap, “ka Seng ka kwah ban banjur ba kum kine ki jingthung kam ki bym khuid kan dang ïai jia katba ka Sorkar kam pat lah ban pyntreikam ïa ki 20 tylli ki mat jingdawa jong ka Seng ba la buh na bynta ka MPSC. Kine ki mat kim dei tang na bynta ka MPSC hynrei ïa baroh ki tnad treikam jong ka Sorkar jylla baroh kawei bad lada pynurlong lut ïa kine ki mat ka seng ka ngeit ba kan wanrah shibun ïa ka jingkhuid ha ka thungkam ha ki tnad Sorkar bad kan pyrkhing ïa kino kino kiba thmu ban leh tuh.”
“Ka Seng ka bitar ruh ba wat lada katto katne ki MLA ka jylla ki la ïakren ha ka Dorbar Synrai jong ka Iingdorbar Thawaiñ ba dang shu kut ha ka taiew baladep halor ki mat ban wanrah ïa ka jingthung kam kaba khuid hynrei ym shym la shim satia ïa ka rai kaba pura halor kane ka bynta bad kiei kiei baroh ki sah tang ha ka jingïakren,” la kynthoh ka KSU.
“Ka Seng ka maham jur ïa ka Sorkar ba lada ka sngapjar halor ki 20 tylli ki mat jingdawa, ka Seng ha ki sngi ki ban sa wan kan wanrah ïa ki jingïakhih bapher bapher,” la maham ka KSU.
