Shillong, Risaw, 24: Ka Butcher Association of Meghalaya (BAM) ha ka sngi Palei ka la ujor sha ka Deputy Commissioner jong ka East Khas Hills District ka Kong RM Kurbah kaba dei ruh ka Chairman jong ka District Animal Market Monitoring Committee (DAMMC) ban phah tohkit bad ban phah khynra naphang ïa ka jingdon jong ki ïew khaii masi beaiñ bym shym la ïoh jingithuh na bor Sorkar hapoh u pud u sam jong ka East Khasi Hills District.
Ha ka jingïakren bad ki lad pathai khubor, u President jong ka Butcher Association of Meghalaya u Bah Erson Marweiñ u la ong, “ka jingmad jingeh jong ngi ki nongot doh ka dei namar ka jingdon jong ki iew khaii masi beaiñ kiba don ha kylleng ka East Khasi Hills District. Ngi la aiti da ka jingthoh ha ka Deputy Commissioner ba kan peit pyrman ïa kine ba lada don kano kano ka iew ïadie ïathied masi bym pat ïaid lyngba ka District Animal Market Monitoring Committee kan shim da ka sienjam ban ïaid katkum ki kyndon jong ka aiñ wat ban kurup ïa ki mar.”
U la ïathuh ba ka Deputy Commissioner ka la pyntip ba kan sa khot da ka jingïalang mardor ïa kiba dei peit ba kin sa leh ïa kaba donkam namarba ka aiñ ka la don lypa sa tang ban shu pyntreikam beit.
Haba kylli, u la ong, “katkum ka jingtip jong ngi, katba nang mih ki sngi ki nang bun. Mynta da ki phew tylli kine ki iew ki don. Da ka jingdon jong kine (ki iew beaiñ) ka pynsuk ïa kiba khaii beaiñ ïa ki masi sha ka ri Bangladesh. Kawei ka jingeh, ka dei ka koit ka khiah. Ki iew beaiñ kim don wat tang u doktor bad ka jaka ba peit bniah ïa ki masi. Ka jingwanrah ïa ki mar (masi) ruh ka la long kaba beaiñ.”
“Lada ki don ki iew kiba ïaid katkum ki kyndon jong ka District Animal Market Monitoring Committee kan jin da la bha shikatdei eh namarba ki don lut ki jingdonkam kiba bun,” ula bynrap.
U la ïathuh ba ki iew khaii masi beaiñ ki don ha ka thaiñ Laitlyngkot, Mylliem bad ha kiwei kiwei ki jaka.
“Ka shong ha ka District Animal Market Monitoring Committee ban phah tohkit khnang ban lap ïa ki jingshisha,” la kyntu u Bah Marweiñ.
U la ong ruh ba ka jingkiewdor jong ka doh masi ka dei na ka daw ka jingdon jong ki iew khaii masi be-aiñ bad kaba kham pynnoh mynsiem ïa ki nongdie doh masi ka long ïohba ka wan lynshop biang ka jingpang sniehdoh ha ki masi.
Katkum ka jingïathuh jong une u nongïalam ka BAM, kam don satia ka jingduna jong ka doh masi kaba wan nabar shapoh ka jylla hynrei ka jingdon jong ki iew khaii masi beaiñ ka ktah ïa ka dor jong ka doh masi.
“Ka jingshalan tuh ïa ki masi sha Bangladesh ngi hap ban thied ha ka dor ba la khaii (tuh) sha Bangladesh. Mynta kam dei ka jingeh ha ka doh, hynrei wat ka jingleit (shalan ïa) u piat, ka shini, ki paidbah kin sa mad jingeh ïa kane. Ngi thnum ba kiew shi kiew dor hynrei ngim tip pat ïa ki daw tynrai. Ka jingeh kaba mih na ka jingshalan beaiñ sha Bangladesh,” la kynthoh u President ka BAM.
“Kaba sngewsih ka long ba ym don mano mano ruh ba shimkhia bad ka jingmih jong ka seng shakhmat ka long namarba ym don ba shimkhia ïa ka jingmih ki iew khaii masi be-aiñ,” la ong u Bah Marweiñ.
Katkum ka jingong jong u, ban thied ïa ki masi na ki jaka ba ju wanrah ka la buh jingeh ïa ki nongshoh doh namarba ka jingthmu jong ki nongdie ka long ban ïoh die beit sha Bangladesh namarba ka dor ka la long kaba heh.
“Ngi hangne ruh ngin sa mad ïa ka jingkiewdor lada ngim lah ban tehlakam ïa ka jingkiewdor. Lada ngim mih shakmat ban kren halor kane kan sa kiew ka dor,” u la bynrap.
U la ïathuh ba ka doh masi khleh shyieng shi kilo ka shongdor T.500 bad ka doh met T.600 shi kilo.
