Shillong, ïaïong, 01: Ka Hynñiewtrep A`chik National Movement (HANM) ha ka Lah Sngi u Blei ka la ujor da ka ejahar sha u Superintendent of Police jong ka East Khasi Hills District pyrshah ia u Gopal Dey uba kam ialade kum u President jong ka Coordination And Welfare Committee (CWC), na Shella-Bholaganj bad dawa ruh ia ki Pulit ban kem mardor ia u Gopal Dey.
Ha ka jingiakren bad ki lad pathai khubor, u Asst. Secretary ka HANM u Bah Wyraiwan Sohtun u la iathuh ba ka seng ka la mudui da ka ejahar pyrshah Gopal Dey halor ka shithi ba u la phah sha u Myntri Rangbah ka Jylla u Conrad K Sangma ha ka 29 tarik, Lber, 2024 uba kam ialade kum u President jong ka Coordination and Welfare Committee, Shella Bholaganj Block and Adjoining Area bad ong ruh ba ka seng kam lah satia ban pdiang ia ka jingteipop pyrshah ia ka KSU halor ka jingshah pyniap jong ki arngut ki bar jylla ha ka 27 tarik, Lber, 2024 ha ka shnong Ichamati.
“Ngim don kano kano ka jingpyrshah halor ka jingphah ia ka shithi sha u Myntr Rangbah. Manla ki nongshong shnong ki don ka hok ban pynpaw ia ki jingeh ki jong ki, hynrei katba ka tnat Pulit ka dang pynlong ia ka jingtohkit halor kane ka jingjia bad kum kine ki jingkynnoh pyrshah ia ka KSU ka long ka bym lah satia ban pdiang bad kane kan wanrah ia ka jingbym iasngewthuh jingmut hapdeng ki nongshong shnong ka jylla,” u la ong.
“Namarkata, ki Pulit ki dei ban pynshitom ia u Gopal Dey halor kine ki jingkynnoh katkumk ki kyndon jong ka aiñ. Ka Seng ka shaniah tylli ia ka ain bad ia ka tnat Pulit ha kaba ki nongleh kam bymman ki dei ban shah kem bad ban shah pynngat hapoh ki kyndon ain jong ka ri,” la bynrap u Bah Sohtun.
U la ong ruh ba ka seng ka pynrem jur halor ka jingshah pyniap jong ki arngut ki bar jylla kiba la tip kyrteng kum u Ishan Singh bad u Sujit Dutta ha ka shnong Ichamati ha ki runar.
“Ngi kyrmen ba ka tnat Pulit kan ym pynslem ban lap ia ki runar kiba leh ia kane ka kam bymman lada dei mano mano ruh bad ai ba ka aiñ kan leh la ka jong ka kamram,” ong shuh shuh u nongialam ka HANM.
“Ngi Kyntu ruh ia ka tnat Pulit ban kem ia ki briew kiba pynsaphriang ha ka Social Meidia ia ka shithi ba khlem don jingsoi kaba byrngem ia ka KSU, namarba kane ka shithi ka dei kaba la phah sha u President bad sha u General Secretary ka Khasi Students Union. Ia ki briew kiba donkti dei ban kem bad ban pynshitom,” la dawa ka HANM.
