Shillong, ïaïong, 01: Da ki phew tylli ki iing ki sem ha ka thaiñ Block II, Ri Bhoi District ki la shah punjulor ha ka erïong kaba la wan lynshop ha ka janmiet Sngi U Blei kumba ha ka por 4:00 baje janmiet.
Katkum ka jingiohlum jingtip, la iathuh ba kane ka erïong bajur ka la lynshop ym tang ïa ki ïing ki sem ha ka thaiñ khappud Block II hynrei da ki phew tylli ki ing ki sem ha ka thaiñ Jirang ruh ki la shah pynjulor bad kumjuh ha ki bynta bapher bapher jong ka them Ribhoi.
Ha ka thaiñ Block II kaba hap hapoh ka Raid Nongtung, lai tylli ki shnong ki la shah ktah bha ba kynthup ia ka Shnong Ummat-I, Ummat-II bad ka shnong Nongsder ha kaba 28 tylli ki ïing ki la shah pynjulor ha ka erïong erngit bad bun na ki longïing ki la kylla khlem ïing khlem sem.
La iathuh shuh shuh ba nalor ka jingpynjulor jong ka eriong ia ki ing ki sem, wat ki jingthung jingtep ruh ki la shah pynjulor ha u Phria.
U President jong ka Synjuk ki Rangbah Shnong Border Area ka Raid Nongtung u Bah Blikshon Sohtun u la iathuh ba ka jingwan lynshop kynsan ka erïong ka la ktah ïa kiba bun ki Longïing longsem kiba la shoing khlem ïing khlem sem namarba ka eriong erngit ka la pynjot pynpra ia ki ïing ki sem jong ki.
Na ka liang jong ka Synjuk bad ki nongïalam shnong ki la kyrpad ia ki bor sorkar ba kin phah ban jurip mardor ïa ki longïing kiba shah ktah bad ha kajuh ka por ban thaw lem ïa ki lad jingïarap sha ki lanot kiba la shah ktah ha ka eriong.
