Shillong, Jylliew, 15: Ha kawei na ki jingjia basngewsih kaba la pynsuhjer ia ki marjan marpa bad ia ka shnong ka thaw baroh kawei ha ka shnong Mawlai Nongmali, Shillong ka Kong Amanda Lyngdoh Nonglait ha ka sngi Palei ka la mudui da ka ejahar sha ki Pulit jong ka Mawlai Police Station halor ka jingiap kyndit jong ka hynmen jong ka, ka Kong Steffanie Lyngdoh Nonglait kaba la 30 snem eiei ka rta.
Katkum ka ejahar, ka Kong Amanda ka la pyntip sha ki Pulit ba ka la ioh ia ka khubor halor ka jingkhlad jong ka hynmen hapdeng ka por 8.45 duna bad 9:00 baje eiei mynmiet ha ka sngi balang ia kaba la leit pyntip hi da u kurim jong ka Kong Steffanie halor kane ka jingjia u Bah Trophius Nongbri.
Ka kong Amanda ka la pynpaw ruh ha ka ejahar ba kum ka ing ka sem kam lah satia ban pdiang ia kane ka jingkhlad kyndit jong ka kong Steffanie namarba ka dei ka briew kaba don hapdeng ka met kaba koit ba khiah.
Ki bahaing hasem kiba dap da ka jingsngewsih marmar ki la leit sha ing sah jong ka Kong Steffanie ha kaba ki la kam ba ki la lap ia ki dak ki shin ha ka bynta jong u ryndang bad kum ka ing ka sem ki la suba jur ba ia kane ka kam bymman la leh hi da u kurim u Bah Trophius Nongbri.
Shuh shuh ka Kong Amanda ka la pyntip ha ka ejahar ba ka Kong Steffanie ka dei kaba dang pun ruh ia i khunlung iba dang hapdeng ka rta kaba 2 ne lai bnai.
Ha kaba iadei bad kane ka jingjia, ki Pulit ki la kem noh ia u Bah Trophius Nongbri bad ka jingtohkit halor kane ka jingjia ka dang iaid shakhmat. Na ka liang jong ki bahaing hasem ki dang ap ban ioh shimti noh ia ka met na NEIGRIHMS Hospital hadien ba la pyndep ia ka jingle post mortem.
