Shillong, Jylliew, 15: Ka Hynniewtrep Achik National Movement ha ka 15 tarik u Jylliew, 2023 ka la aiti da ka jingthoh ha u Myntri ka Sorkar Jylla u Bah Paul Lyngdoh uba long ruh u Chairman jong ka Regional Committee na ka bynta ka West Khasi Hills da kaba kyntu ia ka Sorkar Jylla ba kan pynsngew sha ki tyndong skhor jong ka Election Commission of India pyrshah ia ki briew kiba sah ha Langpih kiba bat ar tylli ki EPIC , kawei na ka jylla Meghalaya bad kawei na ka Jylla Assam.
Ha ka jingiakren bad ki lad pathai khubor, u General Secretary jong ka Hynniewtrep Achik National Movement u Kyllang Thongni u la kynnoh ba ki briew kiba sah ha ki thaiñ khappud khamtam ki bym dei ki Khasi ki dei kiba don ia ka EPIC jong ka Jylla Meghalaya bad ka Jylla Assam bad dei halor kane ka daw ba kan jwat bha ka jingiapynbeit pud hapdeng ki ar tylli ki Sorkar ban pynkut noh ia ka jingiajia pud kaba la neh mynta la san phew snem kynthih ha ka thaiñ Langpih. “Ngi la dawa ia u Chairman jong ka Regional Committee ban shimkhia da kaba pynsngew ia kane ka kam sha ka Election Commission of India bad ban thung ruh da ka jingtohkit khnang ban lap ia ka jingshisha khnang ba ia ka jingkajia pud ha ka thaiñ Langpih yn dup lah ban weng noh mardor,” la ong u Bah Thongni.
