Shillong, ïaïong 13: Ka Voice of the People’s Party (VPP) ha ka sngi Saitjaiñ ka la mudui da ka ejahar sha u Superintendent of Police ka East Khasi Hills District halor ki jingshah pynjah burom jong ka party ha ka rynsan Social Media kaba la saphriang haduh katta katta.
Ha ka ejahar ba la soi da u Election Ageng jong ka VPPP Bah Danny Langstieh uba dei ruh u Finance Secretary u la pyntip ba ki don ki video Clips lane ka Video Interview ba la pyllait ha ki lad pathai khubor kiba paw lyngba ka YouTube bad ka kyrteng ka News Video Interview kaba la ong “Ka ilekshon kam dei ban wanrah ka jingïapher niam ba la ong da uwei u nongïalam niam” bad ha ka jingkynthoh ha kane ka Youtube Channel ka long ha ka kyrteng jong @jsyiemliehmaduh413 kaba la kynthoh, `Ha u prah me phadar” bad ha kawei pat ka jingkynthoh kaba la kynthoh da uwei uba ai kyrteng da @FahvasFahva-me7yk kaba la kynthoh, “Ha u prah noh me doh lap sngew mat.”
Na ka liang jong ka VVP, ha ka jingmudui ejahar ka la pynpaw ba da kaba buh ïa kine ki jingkynthoh ha ki rynsan paidbah, ka la pynjah burom bad ka la pynpohdor ïa ka ‘The Voice of the People Party’ baroh kawei bad lah ban kdew bad kum kine ki jingkynthoh pynrem ka la pynjah burom, ka la wanrah ruh ia ka khana sniew ba la kynthah beit beit ïa ka kyrteng kaba bha jong ka VPP hapoh ka jylla.
Ka VPP ka la ong ba kine ki jingkynthoh ha kine ki Youtube Channel ka la pynsniew dur ïa ka seng sainpyrthei kaba la paw ha ka jylla bad ia kane ka jingujor la mudui khnang ban pynrung noh kyrkieh hapoh ka First Information Report hapoh ki kyndon aiñ jong ka Indian Penal Code, 1860 bad kumjuh ruh hapoh ka Information Technology Act, 2000 lane ha kine kino ki aiñ kiba ïadei bad kane ka kam.
U Bah Langstieh u la ong shuh shuh ba ka party ka la kyrpad ba ki Pulit ba kin shim kam noh kloi bad ban kem ïa ki runar bad ban pynshitom katkum ki kyndon jong ka aiñ.
Ka VPP ka la phah kopi ruh ia kane ka ejahar sha ka Cyber Crime Branch Office, Secretariat Hills Shillong, sha u Chief Electoral Officer (CEO) ka jylla bad sha u Commissioner and Secretary ka tnat Election.
