Shillong, ïaïong 13: Ki shipai BSF ha ka sngi Saitjaiñ ki la ïaid pahara ha nongbah Shillong shwa ba ka Jylla Meghalaya kan leit sha ka ilekshon Lok Sabha ka ban sa long ha ka 19 tarik mynta u bnai.
Ka jingïaid pahara jong ki shipai BSF ka long ban pynneh ïa ka shongsuk shongsaiñ ha East Khasi Hills District hadien ba arngut ki bar jylla ki la shah pynïap dang shen ha ka shnong Ichamati ha ka 27 tarik u bnai ba ladep bad uwei u nongbylla misteri bar jylla u la shah pynïap ha Mawlai Mawroh mynta ka taïew.
Nalor kata, hadien ba la mih ki pynwit ha ki jingïalang da ki nongkyrshan jong kiwei ki party, ki bor synshar District ki la phah pahara da ki Pulit ha ki jaka ba pynlong ïa ki jingïalang khnang ba kin ym mih kino kino ki jingjia ba sngewsih.
Uwei u ophisar Pulit u la ïathuh ba ka jingthmu jong kane ka jingïaid pahara ki shipai BSF ka long ban wanrah biang ïa ka jingshaniah ki paidbah bad ban tem ïa kino kino ki jingjia.
Ha kane ka sngi, ki shipai BSF ki la ïaid kjat naduh SP’s Office ter ter shaduh Laitumkhrah bad Rynjah. Kane ka jingïaid pahara ki shipai kan dang bteng haduh ka sngi thep vote.
Kum ban shu pynkynmaw hangne, ha ka 10 tarik mynta u bnai, ka ing jong ka MDC ka NPP na Umsning Constituency ka Kong Macgalyne Sawkmie Mawlong ha ka shnong Mawlein Mawkhan, Sohkyndur, Ribhoi District bad u maw uba la kawang da ki runar u la lait salit na ka khlieh jong ka Kong Macdalyne katba ka dang ieng ban kren phone ha phyllaw ïing.
