Shillong, ïaïong, 09: Ka Voice of the Poeple Party (VPP) ha ka sngi baar ka la mudui pyrshah ia u nongialam jong ka National Peoples Party (NPP) Bah Pyniaid Sing Syiem ha u Chief Electoral Officer (CEO) ka Jylla halor ki jingkynnoh jong u pyrshah ia ka VPP ba ka dei kaba thaw jingkulmar ha ki jingialang jong ka National Peoples Party (NPP).
Ha ka jingmudui ba la soi da u Election Agent Bah Danny Langstieh, ka VPP ka la ong ba kine ki jingkynnoh jong u Bah Pyniaid ki long ha ka 6 tarik bad ha ka 8 tarik mynta u bnai katba u dang kren ia ka rynsan ialap elekshon na ka bynta ka NPP ha Rynjah, East Khasi Hills District bad ha Umsning, Ribhoi District
Ka VPP ka la mudui ruh halor ka jingshoh bad ktah kti da ki briew kiba don ha ka jingialang jong ka NPP pyrshah ia ki riewpaidbah tang namarba ki pyrta ia ka shab jong ka Voice of the People Party (VPP).
Ha kajuh ka por, ka VPP ka la pynpaw ruh ba katkum ka jingioh jingtip da ki nongtrei jong ka party, ba ka lah ban don ka jingpyrshang ban tuklar ia ka jingiaid beit ka jingpynlong ia ka elekshon ha ka jylla khamtam ha rilum Jaiñtia da ki nongshim kabu.
“Ka lah ban don ruh ka jingthep tuh ia ka vote lada ki Polling Official kim long kiba peitngor bad kiba kut jingmut ban pynthikna ba ka elekshon kan long kaba khuid kaba suba,” ong ka VPP ha ka mudui sha u CEO.
“Ka party ka kyntu jur ia phi ban shim ia ki lad ki lynti ban pynthikna ba ka jingpynlong ia ka elekshon kaba khuid bad suba kam dei ban shah pynthud bad ba ki nongthep vote ki dei ban ioh lah ban thep ia ka vote ka jong ki khlem kano kano ka jingsheptieng bad ba ka jingthep tuh ia ka vote kam dei ban jia,” la bynrap shuh shuh ka VPP.
