Ha kine ki khyndiat bnai ba ladep, ka jingkhmih lynti ki paidbah ka ri Khasi-Jaiñtia ban pynthymmai biang ban ïoh jied thymmai ïa ki nongmihkhmat(MDC) sha District Council ka la pulom noh hadien ba ka sorkar MDA-II hapoh ka jingïalam ka party NPP (UDP+BJP, etc), ka la rai ban pynjlan noh (extend) shwa ïa ka Election sha District Council hadien sa 6 bnai pat.
Kane ka rai ka long ka bym pat ju kham jia koit ha ri Khasi-Jaiñtia (lait noh ha Garo Hills) ba ka Sorkar ba la jied da u paidbah (elected Govt.) ba kan pynkheiñ pylleiñ pylleiñ ïa ka riti ka dustur jied nongmihkhmat paidbah (traditional democracy) naduh kito ki por ba la kha ïa ka District Council ha ka jylla jong ngi.
Bun ki paidbah kim da salia ne suidniew than eh ïa kum kane ka raibi (preceedence) kaba la leh khyllah da kane ka Sorkar hynrei ka long ka jingma kaba shyrkhei bha namar ka jingïaid lait bad iuhroit ïa ka hok longtrai (democratic rights) jong ki paidbah ka ri Khasi- Jaiñtia jong ngi ban jied nongmihkhmat shisien san snem.
Kumno kin ïakren ban pynneh pynsah ïa kata ka riti ka dustur u paidbah haba ki ladep pynkheiñ bad ñuhroit lypa ïa ka hok u paidbah ban jied MDC ha manla ka shisien san snem tang na i daw bym shongnia (unjustified reason)?
Ym dei tang katta, hynrei don kiba peit thuh bha ba kane ka Sorkar kan sa pynjlan (extend) shuh shuh ïa ka por treikam (tenure) jong kine ki MDC shu thung (political appointees) sa sha ka 6 bnai shuh shuh namar hapoh u bnai September ba la kut kane ka por (entended tenure), ka dang dei ka por slap ym pat long, kin hap rah biang sa 6 bnai eiei haduh ban da poi syndon ka por tlang.
Ki shu ïalehkai (play politic) katba mon kat ïa ka hok jong u paidbah ruh. Shaei kane kan ïalam? Ki paidbah ki tip kham bha ïa kata.
Ha ka jingshisha, shisien ba la kut hok ka por ne ka samoi treikam jong ki (tenure), lah dei ban sngewlehraiñ ban khot MDC ïa ki. Ki dei bad ïa syriem tang kum ki MDC ba la thung bad isynei ka Sorkar ïa ki (just political appointees only) ban dang ïoh ka tulop suk, ka bai leit-bai wan (allowances) etc ban ïoh kjit suk ïa ka pisa u paidbah khlem da shah jied shuh da u paidbah ïa ki.
Ban shu lehmon ne lehkai ïa ka hok u paidbah ym ju long. Ki ju ong, ‘Ki khun ïohmon kim ju long ei ei’.
Ban shu lehbein ïa kiba rit ba ria (paidbah) ruh ym ju long namar kan sa poi ka por ba uba rit ba ria (voters) ruh u don la ka jong ka bor ha kawei ka sngi.
Ka ktien ka ju ong te, ‘Uba rit ruh (u paidbah) u don la ka kylla (ka bor ba triem), lada ngi lehbein ïa u, ka long kaba triem ynda u la khie thiah (ka bor ba triem por election).
Kynmaw bha, ‘Lada ngi leh bein ïa kiba tlot, ngin sa liem pat ha kiba kham khlaiñ’.
Wat ong ne kob than ba phin jop lut ïa ka pyrthei. Kat u Kyieng uba pynliem kat ïa u Sing, u la ngat ka apot bad shah pynïap pynban tang ha ka khniang thapawa kaba rit.’ Biang hawei, duna hawei, ym don ba janai’.
