Shillong, Jylliew, 12: U MLA jong ka Voice of the People Party na North Shillong Constituency u Bah Adelbert ha ka sngi Balang u la mudui sha u Secretary jong ka Lok Ayukta halor ka jingsuba ba ka don ka jyrsieh bamsap ha ka Sobhagya Scheme ha u snem 2023.
Namar ka jingbym don jong u Chairman ka Lok Ayukta, u Bah Adelbert u la aiti ia ka jingujor ha u Secretary ka Lokayukta u Bah Rapthap halor ka kyndon 13 (1) A Prevention of Corruption Act 1998.
Katkum ka jingiathuh jong u Bah Adelbert ha ka jingiakren bad ki lad pathai khubor, ka Sorkar Pdeng ka la mang T. 156 klur ia ka jylla Meghalaya na ka Saubhagya Scheme bad la jied ruh ar tylli ki kompeni ba kynthup ia ka Satnam Global Infra Project Limited, New Delhi bad ka Onycon Enterprise, Mumbai ban pyntreikam ia ka skhim ha u snem 2018.
U Bah Adelbert u la pynpaw ia ka kaiphod CAG halor ka Sobhagya Scheme jong u snem 2023 u ladep ban rah hakhmat ka Ingdorbar Thawaiñ jong ka Jylla bad u la pyrshang ruh ban iatai hynrei u Lamphang um shym la ailad satia katkum ka Rule 241.
Shuh shuh u Bah Adelbert u la ong ba kane ka jingujor sha ka Lokayukta ka long ban rat ryngkhong ia ka jyrsieh bamsap bampong hapoh ka jylla Meghalaya bad bynrap ruh ba kane ka pisa ka ktah ia ka pla tyngka jong u paidbah.
