Shillong, Nailur, 25: Ka Kynhun Myntri jong ka Sorkar Jylla ha ka sngi Balang ka la mynjur ïa ka jingtyrwa ban thied jaka shuh shuh na ka bynta ka jingpynheh ïa ki ar tylli ki kad liengsuiñ hapoh ka Jylla, kata Shillong Airport bad ka Baljek Airport.
Ka Sorkar Jylla ka la rai ruh ban pan jingbit na ka Directorate General of Civil Aviation (DGCA) hadien ba ka jingsorjamin ka la pynpaw ba la donkam ban pynheh ïa ka Shillong Airport na ka bynta ka jinghiar jong ki liengsuiñ kiba heh.
Haba pyntip ïa kane hadien ba la wai ka jingïalang, u Myntri Rangbah ka Jylla u Conrad K. Sangma u la ong, “mynta ka sngi ka Kynhun Myntri ka la ai jingmynjur ban ïaid shakhmat bad ban sdang noh ïa ka kam (ban thied jaka na ka bynta ka Shillong Airport).”
Da kaba kdew ïa ka jingai jingtip kaba bniah ba la ai da tnat Transport u Myntri Rangbah u la ong, “mynta ngi dang don ha ka kam. Ïa ka jingsorjamin la pyndep ryngkat bad ka Airport Authority of India (AAI), ka jingsorjamin bad ka Technical Report ki ladep nadong shadong. Mynta, ngi kyrmen ba ngin sa lah ban shna ïa ka jaka pynher liengsuin (runway) khnang ba ki liengsuiñ (commercial flights) kum ka A320 bad ka Buoying 373 kin dup lah ban hiar hapoh ka kad liengsuiñ.”
U la ong ruh hadien ba la bishar bniah ïa ka kaiphod ba la aiti da ka tnat Transport ryngkat bad ka AAI, ka bynta kaba sah mynta ka long ban shong pyrkhat sa bad ka DGCA bad ban aiti ïa kane ka (jingtyrwa) sha ka DGCA.”
Ha sngi Baar, ka Airport Authority of India (AAI) ka la pyntip ïa ka Ingbishar Meghalaya High Court ba ka jingpynheh ïa ka surok pynher liengsuin ha Shillong Airport da 571 meter yn lah ban shna hapoh ka jinglut kaba kot T. 100 klur da ka Sorkar Jylla, lait noh ha kabai ïadei bad kiwei kiwei ki jingpynlut ban sa bei da ka AAI kaba lah ban kot haduh T. 500 klur.
U General Manager ka AAI u Dr. Gursewak Manish u la batai ruh ba ka jingsorjamin ka LiDAR, ka jingsorjamin ïa baroh kawei ka kad liengsuiñ la pyndep lut nadong shadong.
Haba kylli halor ka jinglong jingman jong ka Baljek Airport u Myntri Rangbah ula ong ba ka jingïakren na ka bynta ban thied jaka ka dang ïaid shakhmat.
“Ka jingthied shuh shuh ïa ka jaka, ka jingithuh da ka Revenue Branch jong ka DC Office ka dang ïaid shakhmat. Ka AAI kam shym la hun satia ïa ka kaiphod ba nyngkong, hadien kata, la pynkhreh pat sa ïa ka kaiphod kaba bniah khnang ba ar tylli ki kad liengsuiñ Shillong bad Baljek kin ïaid lang ryngkat ryngkat,” la ong u Sangma.
