Shillong, Risaw 18: Ka kynhun Myntri jong ka Sorkar Jylla ha ka sngi Balang ka la mynjur ïa ka Meghalaya Street Vendors (Protection of Livelihood and Regulation of Street Vending) Scheme 2023, bad lyngba kane ka kyndon yn peit ïa ka bit ka biang jong ki nongdie madan bad ha kajuh ka por yn peit ba ka ki nongdie madan kin ym pynwit ïa ki nongiaid lynti, ïa ki kali, ïa ka jingkhapngiah ki lynti iaid kjat.
U Bah Paul Lyngdoh uba long u Myntri bad u Nongaiktien jong ka Sorkar Jylla u la iathuh ba lyngba kane ka skim, ka sorkar kan sa sorjamin ban lum jingkhein ia ka jingdon jong ki nongdie madan khnang ban lap ïa ki nongdie madan kiba ladep ïoh jingithuh bad ki nongdie madan ba shu wan die kumto shisien lano.
U la pyntip ba ki nongdie madan ki dei ban don ïa ka EPIC ba la ai da ka tnad Election jong ka Ri, ki don ïa ki syrnot ba pynshisha ba ki dei ki nongshong shnong ka jylla Meghalaya na ka bynta lai snem.
“Ki nongdie madan ki dei ban long kiba la shong die madan harud surok ha kato ka jaka kaba duna eh ruh na bynta 6 bnai bad ba kin don ruh ïa ki Trading Licence kiba biang ha ki jaka ba hap shabar jong ka Shillong Municipal Board,” la iathuh u Bah Paul.
Ka jingpyntreikam ïa ka rai ka long hadien ba ka sorkar ka la ïoh pdiang ïa ki jingai jingmut na kiba bun la ka long naduh ki Autonomous District Council, na ka KSU, na ki Rangbah Shnong bad na ka synjuk ki nongdie madan bad kiwei kiwei ki kynhun.
U la pyntip ruh ba ka Sorkar kan sa phah sorjamni ïa ki nongdie madan bad pyntyllun shakhmat ïa ka kam. U ong ruh ba kane kan kynthup ruh wat ïa ka jingjied ïa ki jaka hangno ban shah shong die madan bad hangno ba yn ym shah.
U la iathuh ba ka Sorkar kan sa shim ïa ka rai ban buh da ka jaka die jingdie na ka bynta ki nongdie madan bad ka iew na ka bynta jong ki. Shwa kane, u Myntri u la pyntip ba ka jingpynrung kyrteng kan shim por sa katto katne por bad kan sa bud pat sa ka jingpeit ïa ki jaka ban buh ïa ki jaka ban shong ki nongdie madan.
U la ïaiban ruh ba ki lynti ïaid kjat jong ki paidbah kim dei da leilei ban shah ba yn pynlong ki jaka iadie iathied.
“Ngin sa jied ïa ki jaka ban die madan ka ban ym ktah ïa ki leit ka wan jong ki kali, ïa ki paidbah ba ïaid ba ieng bad ki ban ym pynthut ïa ka suk ka sain lane ban ym don ka jingkhapngiah.”
