Shillong, Nailur, 05: Ka jingïalang Sector Commander Level Co-ordination kaba la long hapdeng ka kynhun shipai Border Security Force (BSF) bad ka kynhun shipai Border Guard Bangladesh (BGB) hajan ka Borsora Land Customs Station ha Bangladesh ka la rai ban pynkhlaiñ ïa ka jingïadei kaba jan bad kaba skhem bad ban pynthikna ïa ka jingïatreilang ha kaba ïadei bad kino kino ki kam kiba ïadei bad ki kam khappud.
Ïa ka kynhun shipai BSF la lamkhmat da u Dy. Inspector General (DIG) u Manoj Kumar Barnwal, na ka Sector Head Quarter BSF Shillong katba ïa ka kynhun shipai BGB la lamkhmat da u Deputy Director General, Sector Commander BGB, Sylhet, Bangladesh u Md. Saiful Islam Chowdhury.
Ha kane ka jingïakynduh ki nongïalam jong kine ar tylli ki kynhun pahara khappud ki la ïakren halor ki mat bapher bapher kiba ïadei bad u pud u sam kum ka Co-ordinated Border Management Plan bad kiwei kiwei ki kam kiba ïadei na ka bynta ka bha ka miat ha khappud.
Ha kaba kut jong ka jingïalang, ki arliang mamla ki la pynpaw ïa ka jingsngewkmen ïa ki jingïakren kiba don jingmut bad kiba ïajan, kiba pynpaw ïa ka jingïadei paralok hapdeng jong kine ki ar tylli ki kynhun shipai.
Baroh arngut ki Sector Commander ki la khlei ïa ki jingkular ban wanrah ïa ka jingshngaiñ ha khappud bad ïaroh ruh ïa ka jingpyrshang kaba dang ïaid shakhmat jong kine ki ar tylli ki kynhun shipai ban pynneh ïa ka jingsuk ha khappud.
Kine ki ar tylli ki kynhun shipai ki la mynjur ban pynlong manla ka khep ïa ka Coordination Meeting ha ki sngi ki ban sa wan ban bteng ïa ka jingïatreilang bad ka jingïada kaba kham janai ha khappud.
