Shillong, Jymmang, 30: U President jong ka Voice of the People Party (VPP) u Bah Ardent Miller Basaiawmoit u la mynjur ban iashim bynta ha ka jingialang ba la khot da ka Sorkar Jylla ban iakren halor ka Reservation Policy hadien ba ka Sorkar ka la thaw thymmai biang ia ka Komiti ban iakren halor ka Reservation Roster System bad ia ka Reservation Policy.
Watla u Bah Ardent lem bad ki nongialam jong ka VPP ki la mynjur ban leit sha ka jingialang ba la khot pynlong da ka sorkar hynrei ka jingshah thngan jong u Bah Ardent kan dang iai bteng tad haduh ba ka Committee kan shim ia ka rai ban bishar biang ia ka Reservation Policy.
U Bah Brighstarwell Marbaniang uba long u MLA jong ka VPP u la pynbna ba lada ka jingiakren ba la khot da ka Sorkar kam poi shano shano ruh, ka party kan dang bteng ban pynlong ia ka jingiakhih paidbah.
“Ngi dei ban ioh ia kaei kaba ngi dawa ban khmih bniah biang ia ka Reservation Policy,” ong u Bah Ardent haba kren ha ka sngi Baar sha ki paidbah bad ki samla pule kiba ialum sawdong ka jaka shah thngan ha parking Lot markhap bad ka ophis Additional Secretariat.
“Ka party ka la rai ban leit sha ka jingkhot iakren bad ka sorkar ka dei ban mynjur ban khmih bniah ia ka Reservation Policy lym kumta ngan ym mih na kane ka jaka, ngan bteng ia ka jingshah thngan,” la bynrap u Bah Ardent.
“Ka Sorkar ka kwah ba kane ka jingiakhih kan khluit noh bad lada ka don ka jingkhluit kan don ka jingkulmar bad lada ka kulmar ka dei ka Sorkar ka ban kmen. Ngin ym shah riam ha ka jingkwah jong ka Sorkar. Ngi lah ban dom bad ban bitar ba u Bah Ardent u la shah thngan la phra sngi, hynrei ngin ym liat ha ka jingriam jong ka Sorkar,” ong u Bah Ardent.
U la ong ruh watla ka Sorkar ka la khot iakren hynrei ka VPP kan ap ia kaei kaba mih na ka jingiakren lada ka jingiakren kam pynhun ngin bteng ia ka jingshah thngan.
