Shillong, Jylliew, 07: U Bah Constantine Rynga uba dei u trai jong ka Shipara Home Stay kaba don ha ka shnong Nongriat u la ïathuh ba ki shi kurim, u Raja Raghuvanshi bad Sonam ki nongjngohkai pyrthei na Indore, Madhya Pradesh ki la poi ban sahmiet ha kane ka Home Stay ha ka 22 tarik, Jymmang, 2025.
Ha ka jingïakren bad u nonglum khubor ka Batesi TV ha ka sngi Saitjaiñ u Bah Rynga la ïathuh ba kine ki shi kurim ki la mih na kane ka home Stay ha ka sngi kaba bud kata ha ka 23 tarik Jymmang, 2025 ha ka por 6 baje mynstep bad haba u la kylli, kine ki shikurim ki la ïathuh ba kin leit sha Parking bad na Parking kin leit sha Sohra.
U la ïathuh shuh shuh ba mynmiet ki shu order tang ka bam bad leit rung noh sha ka kamra thiah bad mynstep shwa ba kin mih na kane ka Home Stay u la ong ba u la kylli ruh ïa ki la ki ithuh neem ïa ka lynti ba ki wan bad ma ki ruh ki la jubab ba ki ithuh ïa ka lynti ba ki wan.
U Bah Arista Majaw uba la trei la kumba 5-6 snem eiei kum u Guide ha ka shnong Nongriat ban ïalam lynti ïa ki nongjngohkai pyrthei u la ïathuh ba u la ïohi ïa ka jingïap jong u Raja Raghuvanshi bad ka jingjahrngai kurim jong u, ka Sonam na ki lad pathai khubor kiba la pathai jingtip halor kane ka jingjia ha ki YouTube.
U Bah Arista Majaw u kyntu ïa ki nongjngohkai pyrthei kiba wan nabar ka jylla ba ki dei beit ban shim ïa ki Guide ki ban ïalam lynti namarba ka lynti ïaid sha ka shnong Nongriat ka dei kaba dap da ki riat ki ram bad kaba shimpor da ki kynta ban poi sha ka jingkieng jri kaba la khring haduh katta katta ïa ki nongjngohkai pyrthei.
Ka kynhun lum khubor jong ka Batesi ka la ïohlad ban ïakynduh ruh ïa u Manager jong ka Manha Hotel and Restaurant kaba don ha ka shnong Saitsohpen, Sohra, u bym kwah ban pynpaw kyrteng u la ïathuh ba ki arngut ki shi kurim, kata u Raja Raghuvanshi bad ka Sonam ki la wan buh ïa ka pla jong ki ha kane ka Hotel shwa ba kin leit sha ka shnong Nongriat.
Katkum ka jingïathuh jong une u Mananger, ki shi kurim ki la wan poi ha kane ka Hotel ha ka 22 tarik Jymmang, 2025 ha ka por kumba shi baje duna eiei mynsngi bad namarba ka slap da ka jingsngew synei la shah ba kin buh ïa ka pla da kaba tohkit bniah khnang ban ym buh ïa ki nongpynïaid jong ka Hotel ha kano kano ka jingma bad jingmynsaw.
U la ong ruh ba ha kato ka sngi kum u Manager u la shim ïa u mobile number bad ïa ka kyrteng jong u Raja hadien ba u la kular ban wan phai na Nongriat ynda la janmiet lane hadien ar sngi lai sngi ban wan shim biang ïa ka pla.
Hadien kane ka jingjia, na ka liang jong ki bor pynïaid ka Hotel ki la aiti noh ïa ki Footage jong ka CCTV sha ki bor Pulit ba kin pynlong shuh shuh ïa ka jingtohkit kaba bniah halor ka leit ka wan jong u Raja Raghuvanshi ha kaba ïa ka met ïap jong u la lap na riat Mot arliang kaba don hajan ka kshaid Wei Sawdong ha kaba la suba ba u la shah pynïap katba ka Sonam ka kurim jong u haduh mynta ka dang jah rngai khlem pat lap dien satia.
U Manager u la pynpaw ïa ka jingsngewsih halor ka jingpynmih khubor jong kawei ka Youtube Channel kaba ju pathai ïa ki khubor Khasi manla ka sngi na kane ka jylla Meghalaya.
Une u Manager u la ïathuh ruh ba um shym la ïakren eiei bad u nonglum khubor jong kane ka Youtube Channel bad ong ruh ba ka jingpynmih ïa ka khubor ka long kaba ktah bha haduh katta katta ïa ki nongtrei jong kane ka iing basa khamtam haba la kynnoh nongtrei ki tip kham bha kaei kaba don ha ka pla jong u Raja Raghuvanshi bad ka Sonam kaba ki pan jingbit ban buh ha kane ka iing basa shwa ba kin leit sha ka shnong Nongriat.
U la ïathuh, namarba kine ki shi kurim kim dei satia ki Guest kiba sah hapoh kane ka Hotel, hynrei namarba ka slap, ha ka jingisynei la shu shah ban kin buh ïa ka pla hynrei shwa ba kin mih kum u Manager uba peit ïa ka jingshngaiñ jong ki nongngohkai pyrthei bad ki nongtrei kiba sah bad kiba don hapoh ka Hotel la phah plie hi ïa ka pla hakhmat jong ki arngut ki shikurim shwa ba kin mih napoh ka Hotel.
