Shillong, Jymmang, 26: Da ki phew ngut ki riewpaidbah kiba shong basah ha Mawkynrew Constituency ha ka sngi Thohdieng ki la tur sha ka iingsah jong u MLA ka Mawkynrew Constituency u Bah Banteidor Lyngdoh hadien ba u President ka Voice of the People Party u Bah Ardent Miller Basaiawmoit u la shah jingit khlem pud sngi namar ka jingsngap jar jong ka sorkar Jylla halor ka jingdawa ban khot pynlong ia ka dorbar ba kyrpang jong ka Iingdorbar Thawain ban iathir sani bad ban pynbeit thymmai ia ka State Reservation Policy.
Ia kane ka kynhun ki riewpaidbah la ialam da u convenor jong ka Voice of the People Party ka mawkynrew constituency u Bah Seiborlang Warbah.
Namar ka jingbym iakynduh ia u MLA, u Bah Seiborlang Warbah u la shu ioh ban iakren lyngba ka Telephone da kaba kyntu ia u Bah Banteidor Lyngdoh ba un kren lem halor ka jingdawa ban pynbeit thymmai ka Reservation Policy.
U dkhot jong ka VPP Mawkynrew Constituency u Bah Khrawpyrkhat Mynsong, ha ka jingiakren bad u nonglum khubor jong ka Batesi TV u la ong, “kane ka long ka jingkyrpad jong nga sha baroh ki MLA Khasi, mynta phi dang iohi tang ki jingjaw jong ki ummat, wat pynbor ba phin iohi ia ka jingjaw jong ka snam.”
