Shillong, Nailar, 26: Uwei u Freelance Journalist na Guwahati Assam u Snehankar Chakraborty ha ryngkat arngut kiwei pat ki la sdang ïa ka jingïaid lynti tang da kaba niah da ka cycle ha ka 22 tarik, Nailar, 2024 na Guwahati sha Sohra kum shi bynta ban pynsngewthuh ha kaba ïadei bad ka bha ka miat jong ki nongthoh khubor bad kumjuh ruh halor ka jingktah na ka jingkylla jong ka suin bneng.
Ki arngut kiwei pat kiba don bynta lang ha kane ka jingïaid lynti ki long u Santanu Moram uba dei u samla pule bad u Rambabu Thakur uba ieit bha ïa ka jingniah cycle.
Ha ka jingïakren bad ki lad pathai khubor ha Shillong Press Club ha ka Lah sngi u Blei u Chakraborty u la ong ba ka long kaba donkam bha pynsawa ïa ka sur jong ki nongthoh khubor ha kaba ïadei bad ka jingdonkam ban pynbiang ïa ki lad jingïada bad kum ka Pension bad ka Life Insurance.
U la kdew ba ki don palat 3000 ngut ki nongthoh khubor kiba la shah pynïap ha kylleng ka pyrthei katkum ka jingbuh jingkhein jong ka Sorkar ha u snem 2020.
Katkum ka jingong jong u, ki don 99 percent na ki nongthoh khubor kiba la shah pynïap ki bym shym la ïoh ïa ka jingithuh na ka bynta ka kam kaba ki la leh.
Ha kajuh ka por, u la kyrpad ruh ïa ki kynhun bapher bapher ban ïatreilang na ka bynta ban shim ïa ki lad ki lynti ban ïada ïa ka mei mariang na ka bynta ka jingmyntoi jong ki pateng ki ban sa wan.
