Shillong, Jymmang, 11: Ki dkhot ka Khasi Students Union (KSU) Mawshynrut Circle ba la lamkhmat da Assistant Organising Secretary u samla Korbar Marthong bad ki dkhot ki la ioh bat ia kawei ka kali Pickup kaba don ia u nombar AS18 AC 6193 kaba dap smam da ki barjylla katba ka dang wan na ka jylla Assam bad kaba la rung lyngba ka Infiltration Check-gate kaba don ha ka shnong Aradongnga, West Khasi Hills District.
Ki dkhot ka seng kiba la tohkit ia ki bar jylla ki la iathuh ba ki dang thmu ban leit trei sha ka shnong Ummulong, West Jaintia
Haba pan ia ki kot ki sla kine ki bar jylla kim don satia wat tang ban pynshisha ba ki dei ki nong India bad mar mar na ka liang jong ki nongialam jong ka seng ki la pynphai noh ia ki bar jylla bad ia ka kali kaba wan rung beaiñ sha ka jylla khlem ki kot ki sla kiba biang.
Ka seng ka la ther tyngeh ruh ia ki bor Pulit kiba ap pahara ha Infiltration Check Gate kaba shu pyllait laitlan khlem da peit bniah ia ka jingrung jingmih jong ki bar jylla bad ka seng ka la maham tyngeh lada ka dang lap nangne shakhmat ka seng kam banse ban buh hi noh ia ka Infiltration Check Gate ha ki jaka ba ju rung bad mih ki bar jylla.
