Ribhoi, Jymmang 12 : Uwei u rangbah u la duh noh ïa la ka jong ka jingim hadien ba u la shah pynïap dusmon harud lynti jong ka shnong Erpakon, ka shnong kaba ha hapoh Ri-Bhoi District. Ia une u rangbah uba la thiah lyngktar harud lynti hapdeng ka jinglyngkien jong ka snam na ki bynta jong ka skhor la lap da ki nongshong shnong. Kane la ka jia ha ka 11 tarik u Jymmang, 2024 ha ka por kumba 8 baje mynmiet.
Ia une u rangbah uba la tip kyrteng kum u Bah Kyrmen Lyngdoh Nonglait uba la 38 snem ka rta uba shong basah ha ka shnong Erpakon la pynkit noh Civil Hospital Nongpoh ban ioh ïa ka jingsumar hynrei namar ka jingphlei shaba palat jong ka snam ki doctor ki la pynbna ba u la khlad noh na kane ka sla pyrthei.
Ha ka jingïakren bad u rangbah shnong u Bah Michael Thongni bad u Bah Bah Lambor Kharshilot, ki la pynpaw ba kim shym la lah satia ban batai mano ba donkti ban tied klep ia une u rangbah kat haduh ba un da khladnoh na kane ka sla pyrthei.
Na ka liang jong ki bahaiing ki la ujor da ka ejahar ha Nongpoh Police Station bad ki la kyrpad ia ki Pulit ba kin pynlong ia ka jingtohkit kaba bniah ban lap dien ia kiba donkti ha kane ka kam runar.
Ïa ka met jong u Bah Kyrmen la rah noh sha NEIGRIHMS Hospital Shillong na ka bynta ban leh ïa ka post mortem shwa ban aiti noh sha ki bahaing hasem ban pyndep ia ka jinglehniam bakhatduh.
