Shillong, K’Lyngkot 03: Ki runar ki bym lah ban tip ha ka step Sngi Thohdieng ha ka por 6:00 baje eiei ki la prong tuh ïa kawei ka ing ha ka shong Nongsohphoh, Upper Mawprem bad rong ei ïa ka pisa kaba kot T. 30 hajar bad ïa ka ksiar kaba shongdor kumba T. 8 lak.
Ka trai ing ka bym kwah ban pynpaw kyrteng ha ka jingïakren bad u nongthoh khubor, ka la ïathuh ba ki runar ki la prong shapoh ka ing na ka jingkhang kaba don shadien jong ka ing shetja.
Ka la ïathuh ruh ba ka ladep ban mudui da ka ejahar sha ki Pulit jong ka Jhalupara Out Post halor kane ka jingjia bad jer kyrteng ruh ïa uwei u nonglute ba la suba donkti teng ha ki por ba ladep.
Ka la ïathuh shuh shuh ba kane ka jingshah tuh kam dei shuh ka sien kaba nyngkong hynrei ka dei ka jingjia ha ka sien kaba ar.
Ki Pulit jong ka Jhalupara Out Post tang shu ïoh pdiang ïa ka ejahar ki la kem noh ïa u briew uba la jer kyrteng ha ka ejahar na ka bynta ban pynlong ïa ka jingtohkit kaba bniah.
