Shillong, Jymmang 06: Da ki spah ngut ki samla pule ka Jylla Meghalaya kiba ïakhun ïa ka eksamin National Eligibility Cum Entrance Test (NEET), UG ba la pynlong da ka National Test Agency (NTA), ha ka sngi u Blei, ki la shu kylla langkñia tang na ka daw ka jingbakla jong ka jingkylli.
Ha Ribhoi District, napdeng ki 63 ngut ki samla pule kiba ïakhun ïa ka National Eligibility Cum Entrance Test (NEET), UG ki la ïam kthang tang shu mih na ka jaka thok eksamin namar ka jingbym lah shuh ban pyndep ïa ka jingthoh tang na ka daw ka jingthurmur ha kaba sam ïa ki jingkylli kiba ïakhun ïa kane ka eksamin.
Ka jingthurmur ban sam ïa ki Question Paper lyngba ka National Testing Agency (NTA) ka la paw pyrthei ha ka sngi u Blei ha kaba ki samla pule ki la leit thoh ïa ka eksamin ha Alpha English Higher Secondary School kaba dei kawei na ki Code Centre ba la jied da ka National Testing Agency (NTA).
Katkum ka jingïathuh jong ki samla, la ong, ba la sam haduh ar tylli ki jingkylli sha ki samla pule ba la thoh ïa ka eksamin NEET-UG, kata, kawei ka Question Paper kaba wan na ka State Bank of India bad kawei pat kaba wan na ka Canara Bank. Dei hadien shi kynta shiteng ba la ïaid ka jingthoh ïa ka eksamin ki bor ba dei peit ïa ka Centre ki la ïoh jingtip ba kawei napdeng ki ar tylli ki jingkylli ki dei kiba bakla bad bun na ki samla ki kum pynlut ïa ka por ban jubab pyndep shuwa ïa ka jingkylli kaba bakla bad ki hap ban thoh biang da kawei, ha kaba ki la ïoh por sa tang shi kynta shiteng na ka por ba ki ïoh ban thoh lai kynta katkum ka por ba la buh.
Halor kane ka jingshah ktah jong ki samla pule na kine ki kam thurmur ka NTA, ki kmie ki kpa lem bad ki samla pule ha ka Lah Sngi u Blei ki la ïakynduh lang ha ka ophis treikam jong ka Principal ka Alpha English Higher Secondary School, Nongpoh ka Kong W.K Blah ban dawa ba dei ban ailad biang ïa ki samla kiba shah ktah ban thoh thymmai ïa ka eksamin jong ka NEET.
Ka Kong Blah ha ka jingïakren bad ki lad pathai khubor ka la ïathuh ruh ba kane ka jingbakla ha kaba sam ïa ki jingkylli ka dei ka jingbym ïoh ïa ka jingpynshai kaba bniah na ka NTA kaba ki la pyrshang ban ïakren bad ki nongmihkhmat ka NTA, hynrei dei tad hadien shi kynta shiteng ba ka eksamin ka la ïaid ki la ïoh ban ïakren bad u Director jong ka NTA, u Vijay Kumar ba ki la ïoh jingtip ba kawei nadpeng ka jingkylli ki samla kim donkam ban thoh ïa ka.
Ka la ïathuh ruh ba dei ha ka janmiet sngi u Blei ha ka por 8.30 baje eiei ki kmie ki kpa ki la wan ujor halor kane ka jingbakla sam ïa ki jingkylli.
“Ha ka jingïakren bad ki kmie ki kpa ngi la bthah ba kin phah da ka dorkhas ryngkat ka jingsoi ïa ka kyrteng jong ki samla pule kiba shah ktah bad ban kyrpad na ki bor ba dei peit ka NTA ban ailad biang ïa ki samla ban thoh ïa kane kajuh ka eksamin,” la ïathuh ka Kong Blah.
Ym tang katta, ha West Jaiñtia Hills da ki spah ngut ki samla pule kiba la leit thoh ïa ka eksamin ha St Mary’s Mazzerello Higher Secondary School, Jowai kaba dei kawei na ki Code Centre mynta ka sngi ryngkat ka jingsynran lang jong ki kmie ki kpa ki la tur sha kane ka skul ban pynpaw ïa ka jingbitar halor ka jingbakla ka rukom ai ïa ki Question Paper ha ka eskamin NEET.
Ki samla kiba ïakhun ïa ka eksamin ki la kynnoh ba ka don ka jingleh thurmur ha ka jingpynïaid eksamin naduh ka rukom ai ïa ki Question Paper bad ka jingshim ïa ki Admit Card.
Ha kaba ïadei bad kane, ki samla kiba ïakhun ïa kane ka eksamin ki la phah da ka jingthoh u Controller jong ka NEET lyngba ka Centre bad la phah kopi ruh sha u Myntri ka tnat Pule Puthi ka Sorkar Jylla ba un tuklar lem halor kane.
