Shillong, Jymmang, 07: Ia ka Integrated Command & Control Center (ICCC) ba la pyntreikam hapoh ka Shillong Smart City Project ba la bei pisa da ka Ministry of Housing and Urban Affairs, ka Sorkar India yn sa pyndep noh shen.
Ka Sorkar Pdeng ka la bei pisa T. 151.77 klur na ka bynta ban shna pyndep pura ia ka ICCC hynrei ym kumba la paw ha ka Social Media kaba kdew ba yn pynlut T. 150 klur na ka bynta ban pyndait haduh 300 tylli ki CCTV.
Ia kane la pyntip da u Executive Director jong ka Shillong Smart City Project u Vijay Kumar ha u kyrwoh ba la phah sha ki lad pathai khubor.
Ia ka ICCC la pyntreikam, PAN City, hapoh ka Shillong Smart City project ba kynthu ia ka ICCC Building, ka ICCC Platform bad kiwei kiwei ki Software, Data Centre (DC) bad ka Radio Frequency Network (RF NW).
Nalor kine ki tiar bakongsan, ka nongbah Shillong kan sa sakhi ruh ia ka jingpyndait ia ki kor ki bor ba kynthup ia ki CCTV Camera (na ka bynta ka jingpeitngor bad ka jingpyniaid beit ia ki kali)-368, Emergency Call Box (ECB)-42, Public Address System (PAS)-58, Variable Message Displays (VMDs)-20, Street Lights (LED/Smart Lights ba don ia ki Light Point Controller, LPC)-300, Public Wi-Fi Hotspots-60, GPS based Vehicle Tracking na ka bynta ka Solid Waste Management (SWM) Vehicles-50, bad ka Smart Bins-200.
Ka ICCC kaba dei ka jabieng na ka bynta ka jingpyntreikam ia ki kor ki bor technology kan long kum ka pdeng na ka bynta ka Surveillance, Data Processing, Emergency Response Coordination bad ka Smart City Application.
