Nongstoiñ, Naiwieng, 12: Uwei u rangbah briew ba la tip kyrteng kum u Bah Bokstar Sohlang, 50 snem ka rta u la shah pynïap dusmon da kaba shah ot na u pdot. Kane ka la jia ha ka shnong Rimynñiar kaba don ha ka thaiñ Maweit, West Khasi Hills District.
Ka thymmei khubor ba la ïoh na ki Pulit ka West Khasi Hills District la ïathuh ba kane ka la jia ha ka step synnia sngi Baar ha kapor kumba 1:00 baje eiei mynstep bad la suba ruh ba u Bah Bokstar Sohlang u la shah pynïap ha uwei pat u briew uba la tip kyrteng kum u Bah Piswel Langrin hadien ka jingïakajia.
Ka jingïakajia ka la mih na ka jingïadih ïabam hapdeng jong u Bah Sohlang bad u suba nongpynïap u Bah Piswel Langrin kaba la poi shaduh u pud kat haduh ban da dkhat jubor ïa ka mynsiem briew.
U Bah Bokstar Sohlang uba la shah pynïap dusmon u dei uba sah ha ka shnong Mawkhlam-Nongpyndeng bad u dei ruh u nonghikai skul.
Hadien kane ka jingjia, u Bah Piswel Langrin u la phet noh na kane ka jaka hynrei hadien katto katne por da ka jingïarap jong ki paidbah nongshong shnong ki Pulit ki la ïohkem ïa u bad mynta ki dang pynlong ïa ka jingtohkit kaba bniah.
Ki Pulit jong ka Crime Scene Unit (CSU) bad ka Forensics Team (FT) na Shillong tang shu ïoh jingtip ki la hiar sha ka shnong Rimynñiar, ban pynlong ïa ka jingtohkit kaba bniah halor ka jingshah pynïap dusmon jong u Bah Sohlang.
Hadien ba ladep pynlong ïa ka jingtohkit kaba bniah da ka Crime Scene Unit lem bad ka Forensics Team ïa ka met jong u Bah Bokstar Sohlang la pynkit noh sha Civil Hospital Nongstoiñ ban pyndep ïa ki jingdonkam katkum ka aiñ shwa ban aiti sha ki bahaing hasem na ka bynta ban pyndep pat ïa ka jinglehniam ba khatduh.
Ki Pulit ki la register case halor kane ka jingjia bad ka jingtohkit mynta ka la ïaid shakhmat.
