Shillong, Naitung, 20: Palat saw kynta ki paidbah nongleit nongwan ki la sahkut ha ka dheng kali ha ka shnong Mawlangren, kaba don ha ka thain Kynshi ha ka surokbah National Highway 44-E, Eastern West Khasi Hills District namar ka jingpynlong ïa ka jingïakob kwai dohkha bad ka khalai nusip kaba heh ha kane ka jaka.
Kane ka jingdheng kali da ki kynta ka la pynbitar haduh katta katta ïa ki paidbah nongleit nongwan bad kaba ka la pynlong ruh ïa ki katto katne ki paidbah ban ring Video bad phah ïa ki Video sha u nongthoh khubor ryngkat ka jingkynthoh ba ka jingleh jong ki nongpynïaid ka dei ka jingbym burom shuh ïa ka leit ka wan jong ki paidbah tang namar ka kam shimet ki jong ki.
Halor kane ka jingjia u President ka Hynniewtrep Achic National Movement (HANM), Eastern West Khasi Hills District u Bah Artis Ryntathiang u la mih shakhmat ban kren ha ki lad phathai khubor da kaba pynrem ïa kane ka jingjia kaba tang namar ka kam shimet jongno re jongno ki paidbah khamtam kiba pang ba shitom kin hap ban mad ïa ki jingeh ha ka leit ka wan bad sahkut ruh ha ka jingdheng kali da ki kynta kaba ym duna shuh ïa ka 4 ne 5 kynta.
U Bah Ryntathiang u la ong ba hadien ba ka seng ka la ïoh shibun ki jingujor na ki paidbah kiba la shah pynthut ha ka leit ka wan na kane ka jingïakop khwai kan sa leit ban ujor sha u Deputy Commissioner jong ka Eastern West Khasi Hills.
