Shillong, Lber, 24: Ka Khasi Student Union ha ka Lah Sngi U Blei ka la kyntu ïa ka Sorkar Jylla ban da peitngor bha ïa kino kino ki kynhun bad ki seng kiba pyndonkam bakla ïa ki samla na ka jylla da ka jingkular ban aikam lane ban pynshong skul ei.
Kane ka jingkyntu jong ka KSU ka long halor ka jingjia ba dang shen ha kaba arngut ki heprit na ka jylla kiba pule ha kawei na ki skul ba la pynïaid da ka RSS ha Mandya District jong ka jylla Karnataka ki la duhei ïa ka la jong ka jingim hadien ba ki la bam ïa ka jingbam ba la sah.
U General Secretary jong ka KSU u samla Donald V. Thabah u la kyntu ïa ka Sorkar ba ka dei ban shna noh da ka Portal khnang ban lum thik pa thik ïa ki kyrteng jong ki nongshong shnong ka jylla Meghalaya kiba leit pule bad kiba leit trei shabar jong ka jylla.
Ha kajuh ka por u la ong ba ka seng kan sa pan jingkyrshan na ki nongïalam jong ki seng saiñpyrthei jong ka jylla ban pynbor ïa ka Sorkar Pdeng ba kan pynkut noh ïa ki kynrum kynram hapoh ka skulbah NEHU da kaba weng noh ïa u Chancellor ba mynta u Prof. Prabha Shankar Shukla.
U General Secretary jong ka KSU u la ong ba ki nongïalam ka seng kin sa ïakynduh ïa u Myntri Rangbah ka Jylla u Conrad K. Sangma, ïa ki Myntri Sorkar bad ïa ki lai ngut ki MP bad kumjuh ruh ïa kiwei kiwei ki nongïalam jong ki seng saiñ pyrthei kiba don ka jingsngewkhia halor ka jingleh kuman bad ïa ka jingbym lah jong ka Sorkar Pdeng ban shimkhia ïa ka jingdawa ban weng noh ïa u Prof. Shukla.
