Shillong, Nailar, 02: U nongïalam jong ka National Peoples Party (NPP) u Rakkam A. Sangma uba long ruh u Myntri ka Sorkar Jylla ha ka sngi Thohdieng u la sangah tyngeh ïa u nongïalam ka Seng Congress u John Leslee K. Sangma uba dei ruh u MLA barim jong ka South Tura halor ka jingpynrem ïa u Myntri Rangbah ka Jylla Conrad K. Sangma uba kren pyrshah ïa ka jingïa ak kaba pynwandur ïa ka jingkhawai miet ba khatduh jong u Trai Jisu bad ki Synran ne ka ‘Last Super’ ha ka sngi sdang jong ka Paris Olympics 2024 ha kaba la kynnoh ba u Myntri Rangbah u shu pynthame ïa ki paidbah nongshong shnong ka Jylla tang ban ïohnoh ha ka saiñpyrthei.
Ha u kyrwoh, u Rakkam u la dawa ruh ïa u John Leslee ba u dei ban panmap na baroh ki Khristan namar namarba u la pyni ïa ka jingkyrshan ïa ka jingthut jong ka Olympic.
“Nga khmih lynti ba u John Leslee un long u nongïalam ba la ih bha jong ka Congress bad ba um dei ban pynjngut ïa ka jingngeit Khristan da kaba wanrah ïa ka politik ha kum kine ki mat. Ka jingieng pyrshah jong u Conrad Sangma ïa ka jingleh bym dei ha Olympic kam dei ban pynsngewsih ïa u John Leslee hynrei kata ka ladei ban ïoh mynsiem na kane. U la dei hok ban shah pynrem ha ki Khristan bad u dei ban panmap na ka bynta ka jingleh jong u ban pyni ïa ka jingkyrshan ïa ka tamasa jong ka Paris Olympic,” u la ong bad bynrap, “ka jingleh jong u John Leslee kan pynkulmar shisha ïa ki Khristan ha kylleng ka pyrthei bad ka pyni ruh ïa ka jingphiah arliang ïa ki Khristan.”
“Ka jingjia ha ka Paris Olympic ka dei ka jingleh soitan bad ym dei ban ai jingïaroh la ka long ha kano kano ka dur, da uno uno ruh kynthup ïa u. Um dei ban pyndonburom ïa ka kam soitan da kum kane ka jingphla bad ka pyni ba ka kham duna ka jingshong nongrim bad ka jingngeit Khristan bad ban mih shabar pyrshah ïa ka jingieng jong u Conrad ryngkat bad ka jingngeit Khristan ka long shisha kaba ym lah ban pdiang bad ka kam kaba khlem akor,” u la ong.
Haba kyrpad ïa u nongïalam ka Congress ba un kiar na kaba leh politik, u Rakkam u la ong, “ka jingpynrem jong u Myntri Rangbah ka la sakhi ïa u ba u dei u Myntri Rangbah ka niam Khristan bad ka jingieng pyrshah jong u ïa kum kane ka jingbym burom ïa ka jingngeit Khristan ha ka Paris Olympic 2024 ka long kaba dei ban ïoh jingïaroh ha kylleng ka pyrthei.”
