Shillong, Jylliew, 18: U Myntri Khhynnah ka sorkar pdeng ba dei khmih ia ka tnat Dewiong bad ki Par, Satish Chandra Dubey u la ong ba ka skhim PM-Kisan Samman Nidhi ka dei ka dak jong ka jingbteng jong ka jingkut jingmut jong u Myntri Rangbah Duh Narendra Modi na ka bynta ka bha ka miat jong ki Nongrep.
Ha ka jingai jingkren ha ka prokram ba la pynlong ha ICAR, Umiam ha ka sngi Baar ban pyni ia ka jingpyllait u Myntri Rangbah Duh ia ka bynta ba thymmai jong ki jingsiew hapoh PM Kisan Samman Nidhi lyngba ki lad digital, u Dubey u la ong ba yn sam kumba T 20,000 klur hapdeng 9 klur 26 lak ngut ki briew ba dei ban ioh jingmyntoi ha kylleng ka ri. U Myntri u la ong ba ha kane ka bynta kaba mynta, yn sam T 33.86 klur hapdeng 1,20,815 ngut ki nongrep jong ka Meghalaya. Haduh mynta, la phah T 432.36 klur sha ki bank account jong 1,46,758 ngut ki nongrep jong ka Meghalaya, la ong u Myntri.
U Dubey u la ong ba ka PM Kisan Samman Nidhi ka dei kawei na ki nuksa jong ka jingieng skhem u Myntri Rangbah Duh na ka bynta ka bha ka miat jong ki nongrep bad u la kynmaw ia ka por ba la pyllait paidbah ia kane ka skhim da u Myntri Rangbah Duh, Narendra Modi ha u snem 2019 bad ba kumno kane ka la ai jingiarap ia palat 11 klur ngut ki nongrep tang ha ka bynta kaba nyngkong. Naduh katei ka por, la pynlong ia kum kine ki prokram na ka por sha ka por ban pyllait ia ki bynta jong ki jingsiew sha ki nongrep kiba donkam jingiarap.
U la ong ba ha kine ki shiphew snem ba la dep, ka Sorkar, na ka bynta ka bha ka miat jong ki nongrep, ha ryngkat ka jingkyntiew ia ka mang tyngka na ka bynta jong ki, ka la shim ruh ia ki sienjam ban wanrah ia ki skhim bapher bapher ban pynkupbor ia u budlum jong ka ioh ka kot jong ka ri kiba long ki nongrep.
U la pyntip ia ki nongrep kiba la wan iashim bynta ha kane ka sngi ba ka Sorkar ka la kyntiew ia k MSP jong ki mar rep bapher bapher ban ai jingmyntoi ia ki. U la batai shuh shuh shaphang kiewi kiwei ki skhim jong ka Sorkar kiba la iarap ia ki nongrep. Ka Sorkar ka la ban jur ruh halor ka jingkyntiew ia ka kam rep organic ha kylleng ka ri, la ong u Myntri.
U la ban jur ruh ba ki nongrep ki don ka bynta kaba kham khraw ha kaba iadei bad ki jingthmu kum ka vocal for local, ha kaba ki pynbiang ia ki mar rep jong ki sha kiwei kiwei pat ki bynta jong ka ri. U la ai jingsngewnguh ruh ia ki nongrep kiba la wan mih paidbah ban iashim bynta ha kane ka prokram.
U Myntri u la iakren ruh bad ki nongrep ha kaba u la iakren shaphang ka jingpynthikna ia ka jingpynpoi ia ka pisa na ka PM KISAN khlem kano kano ka jingthut bad u la bthah ia ki bor ba dei peit ha ka jylla ba kin weng ia kano kano ka jingeh ba ki nongrep ki iakynduh. U Myntri u la sam ruh ia ki mar rep kum ki jingkynshait dawai, ki pump bad ki kor phut niut sha kito kiba dei ban ioh ia kine.
U Myntri Rangbah Duh ka ri Narendra Modi mynta ka sngi u la pyllait ia ka bynta kaba 17 jong ka PM-KISAN kaba kot sha ka T 20,000 klur bad u la ai syrnot ruh ia palat 30,000 tylli ki self-help group kiba tip kum ki Krishi Sakhi ha Varanasi. Ka Lat jong ka jylla Uttar Pradesh, Anandiben Patel, Myntri Rangbah ka Uttar Pradesh, Yogi Adityanath, Myntri Sorkar Pdeng ba dei khmih ia ka Tnat Kam Rep, Shivraj Singh Chouhan bad kiwei kiwei ki Myntri Sorkar Jylla ki la iadonlang ha kane ka sngi.
