Shillong, Nailur, 21: Ka General Executive Committee jong ka Meghalaya SSA School Association (MSSASA) kaba la long ha ka sngi Saitjaiñ ha nongbah Shillong ka la shim ïa ka rai ban pynlong da ka jingïalang paidbah jong ki nonghikai skul SSA ban shim ïa ka rai ha kaba ïadei bad ka jingtyrwa jong ka Sorkar ban pynkynriah noh ïa ki nonghikai skul SSA na ka State Implementation Society sha ka tnat Pule Puthi ka Sorkar Jylla.
Ha u kyrwoh ba la phah da ka Association sha ki lad pathai khubor, u President jong ka MSSASA u Bah Aristotle Rymba u la ong, “hadien ka jingïakynduh jong ngi ïa u Director jong ka School Education and Literacy (SEL) u Swapnil Tembe uba dei ruh u State Project Director jong ka SSA ha ka 10 tarik mynta u bnai bad kumjuh ruh ha ka jingïakynduh ïa u Commissioner and Secretary jong ka tnat Pule Puthi u Vijay Kumar Mantri ha ka 19 tarik mynta u bnai, ngi la ïoh jingpyntip ba ka Sorkar Meghalaya ka la pynkhreh shaid shaid ïa ka Cabinet Memorandum ha kaba ïadei bad ka jingpynskhem ïa ka kam jong ngi ki nonghikai skul SSA lane ban pynkynriah na ka State Implementation Society (SIS) sha ka tnat Pule Puthi ka Sorkar Jylla.”
U la ïathuh ba ka MSSASA ka la khot da ka General Executive Committee ba la ïashim bynta da ki nongïalam na ki Unit, ki Block bad ki District jong ka jylla Meghalaya ban ïatai ha kaba ïadei bad ka jingpyntip na ka liang jong ka Sorkar.
“Ngi la ïatai halor ki ar tylli ki mat jingdawa kiba ngi la dawa sha ka Sorkar naduh ki snem baladep. Kaba nyngkong ka long ban pynkiew noh ïa ka tulop jong ngi ki nonghikai skul SSA bad kaba ar ka long ban pynskhem ïa ka kam jong ngi ki nonghikai SSA. Ha ka jingïatai kaba la neh kumba lai kynta eiei da kawei ka sur ngi la ïakut ban jied ïa ka Regularisation lane ban ban jied ïa ka pynskhem ïa ka kam jong ngi ki nonghikai SSA,” u la bynrap.
U la ïathuh ba ka GEC ka la ïakut ban rah ïa kane ka rai ha ka General Meeting jong ki nonghikai skul SSA ka jylla Meghalaya ka ban sa long ha ka 2 tarik, Risaw, 2024 ha Madan Students, Jaïaw, Shillong ha ka por 11:00 baje mynstep.
“Ngi kyrpad ïa baroh ki nonghikai SSA ban wan ryntih khnang ban ïoh shim ïa ka rai kaba khatduh,” ong u Bah Rymbai.
