Shillong, Risaw, 23: Ki shipai BSF jong ka 4th Battalion, Meghalaya kiba la ïoh jingtip kaba bniah na ki tnat syntiat ki la ïoh kurup ïa ki mar khaii tuh kiba shongdor palat 16 lak na khappud Indo-Bangladesh jong ka jylla Meghalaya.
Ha ka jingpynap shrip ki shipai BSF ki la ïoh pyllait im 27 tylli ki masi ba la buhrieh ha kawei ka lawbniap hajan khappud ïa kiba la thmu ban khaii tuh sha ka ri Bangladesh. Ïa kine ki masi la aiti noh sha ka Patrol Post Muktapur ban leh ïa kaba donkam katkum ka aiñ.
Ha kawei pat ka jingpynap shrip, ki shipai BSF jong ka 193rd Battalion ki la ïohbat ïa kawei ka kali pick-up kaba don ïa u nombar ML-05-AC kaba kit ïa ki jingsleh pynbhabriew khlem ki kot ki sla kiba biang hajan khappud jong ka East Khasi Hills District.
Nalor kine, ki shipai BSF ki la kurup shi bun bah ki marbam bad ka kiad ha khappud.
