Shillong, Nailur, 03: U Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem ha ka sngi Baar u la ïathuh ba ki paidbah ka Nongthymmai ki la khroh ba un ïakhun noh ïa ka elekshon MDC na Nongthymmai Constituency.
Hynrei halor kane u Bah Pynïaid um pat shim satia ïa kano kano ka rai.
Haba kynthoh ïa ka jingmih khubor, u Bah Pynïaid uba dei ruh u MDC ba mynta na Sohryngkham Constituency u la ong, ka la don ka jingtyrwa na ki nongïalam bad na ki nongkyrshan ka NPP na ki ar tylli ki Constituency ba un ïakhun noh na Nongthymmai Constituency ym shuh na Mawryngkneng Constituency.
Da kaba pynpaw ba um pat shim rai halor kane ka kam, u Bah Pynïaid u la ong ba ka long kaba donkam ban ïathir ïatai bad ban ïathew ïawoh shwa bad la ki nongkyrshan bad ki nongtrei jong ka party halor kane ka kam.
U la ïathuh ba ïa ka rai yn sa shim ynda u la shong jingïalang bad ki nongïalam ka party bad ki nongkyrshan jong ka Sohryngkham Constituency ha ka taiew ka ban sa wan.
Katkum ka jingong jong u, ki paidbah ka Nongthymmai ki la khroh ïa u hadien ba u la shah pynliem noh ha ka elekshon MLA ha u sne 2023.
