Shillong, ïaïong, 28: U MDC ka BJP na Tura u Bernard N. Marak ha ka sngi u Blei u la phah da ka jingthoh sha u Myntri Rangbah ka Jylla u Conrad K. Sangma ban pan jingpynshai halor ka jingpyntrei jong ka ARSS Company ïa ka surok Dawki.
“Ngam banse ba pan jubab na phi halor ki kam jong ka Company ba la don dak sniew-ARSS, kumba nga la ïoh jingtip ka dei kaba don dak sniew bad kaba la shah kyntait namar ka jingpyntrei torti ïa ka surok Dawki ha ka jylla,” ong u Marak.
“Kumno (kane ka company) ka pyntrei sa ha rilum Garo bad mano ba aiti ïa ka kam sha ki bad halor kiei ki kyndon? Ki trok Dumper jong kane ka Company ki dei kiba la ngat ha kiba bun ki jingjia aksiden ha rilum Garo ha kaba bun na ki lanot ki la mynsaw jur, dang shen kawei ka la jia ha ka por shiteng sngi jong ka Sngi u Blei. Mynta ka nohphai sngi, kawei ka samla ka la mynsaw na ki bynta jong ka kjat bad mynta ka dang don ha ka jingshah sumar ha Tura Civil Hospital,” la ong u Marak.
“Ki trok Dumper ki la ngat ha ki ar tylli ki jingaksiden ha ka MDC Constituency jong nga tang hapoh khyndiat por bad mynta ka sngi ha ka por shiteng sngi ka la jia hajan ka ophis MBOSE. Kane ka dei ka jingjia aksiden kaba ar kaba tynrah da ka trok Dumper ha kaba ka khynnah kaba dang 14 snem ka la mynsaw jur na ki bynta jong ka kjat,” bynrap u Marak.
“Halor ka jingdon jingïadei bad ka ARSS, nga dawa jur ban shimkam bad ban pynsangeh ïa ki jingtrei jong ki bad ïa baroh ki jaitkam bad ban pynshitom ïa kiba donkti halor kane ka aksiden,”la dawa une u MDC ka BJP.
U la pan jubab ruh da ka jingthoh ba kumno kane ka company ba la shah ai dak iong ka dang ïohkam ha rilum Garo.
“Da kaba buh sharud ïa ki kam pynroi ha rilum Garo, ka jingmang pisa da ka Sorkar Pdeng ym dei satia ban ai sha ka company ba la don dak sniew. Namarkata, nga kyrpad mardor ban leh eiei, ai ba ki kam ba la shim da ka ARSS Company dei ban pynsangeh mardoh bad ka jingïaid ruh jong ki trok, khamtam ka jingïaid ki trok Dumper ha ka por mynsngi dei ban pyrkhing ha ki jaka sor,” ong shuh shuh u Marak.
