Shillong, ïaïong, 28: Arngut ki khynnah ialehkai phutbol jong ka jylla bakynthup ïa u heprit Mebanpynshngaiñ Khyriem bad u heprit Mangpaka Nongkynrih kiba dei ki rangialehkai jong ka PFR Football Academy, Shillong ki la shah jied na Meghalaya ban iashim bynta ha ka U-13 Final Selection Trial jong ka Reliance Foundation Young Champ ka ban long hapoh Navi, Mumbai Maharashtra naduh 3 tarik Jymmang haduh 7 tarik Jymmang, 2024.
Napdeng ki 25 ngut ki khynnah jong ka jylla kiba la poi sha ka Final Round jong ka Meghalaya Zone, u Mebanpynshngaiñ Khyriem bad u Mangpaka Nongkynrih ki long arngut ki khynnah kiba la shah jied na kane ka Meghalaya Zone ban leit ïa ka Final Selection Trial jong ka Reliance Foundation Young Champ ha ka U-13 Category kaba long ruh ka Trial kaba khatduh ha shwa ba kin ïoh rung shapoh ka Football Camp jong ka Reliance kaba don ha nongbah Mumbai.
Ha kane ka Final Trial ki don 56 ngut ki khynnah na kylleng ki jylla bapher bapher jong ka ri India kiba la shah jied bad napdeng ki 56 ngut katkum ka jingïoh jingtip ka long tang 16 ngut ki khynnah jong ka ri kin ïoh ban don hapoh ka National Camp jong ka Reliance Foundation Young Champ.
U President jong ka PFR Football Academy Bah Franky Kharumnuid ula ong ba ka Academy ka dap da ka jingsngewkmen kaba khraw hadien ba ka la ïoh ïa ka khubor ba u Mebanpynshngaiñ Khyriem bad u Mangpaka Nongkynrih kiba long ki khynnah jong ka Academy ki la shah jied kane ka jylla ban leit ïa ka Final Selection Trial jong ka Reliance Foundation Young Champ ka ban long ha nongbah Mumbai.
U la ong ruh ba kane ka jingshah jied jong ki ka dei lyngba ka jingtrei shitom jong ki Coach kata ka Kong Nylla Mery Wahlang bad kumjuh u Bah Tyngshaiñ Kharlyngdoh kiba la lah ban saiñdur ïa ka sap ka phong ka jong ki bad kumjuh ruh ka jingai mynsiem jong ki kmie ki kpa jong ki.
U la bynrap ruh ka jing shah jied ka jong ki napoh ka jylla kalong ruh ka jingai mynsiem ïa kiwei ki khynnah kiba don hapoh ka Academy ba kin trei shitom ba kin poi sha kum kane thong.
Ka Academy ka phah ïa ka jingkitbok kitrwiang ïa u Mebanpynshngaiñ Khyriem bad u Mangpaka Nongkynrih ba kin lah ban pynni ïa ka sap ha kane ka Trial watla kam long kaba suk ïa ki ban ïoh rung hapoh ka National Camp jong ka Reliance namarba ki hap ban ïakhun ban pynni ïa ka sap jong ki bad ki 56 ngut ki khynnah jong ka ri.
U Bah Kharumniud u la ong ba kum ka Academy ka ngeit skhem bad ka kyrmen ba kine ki arngut ki khynnah kin lah ban ïalehkai bha ban poi sha ka thong.
Ka Academy ka aiñguh nyngkong ïa U Blei Uba la plielad plie lynti ïa kine ki khynnah namar ka ngeit ba kiei kiei baroh ki dei ki jingpynïaid jong U Blei.
