Shillong, Naiwieng 16: Ka Sorkar Meghalaya Democratic Alliance (MDA) ha ka sngi Palei ka la pynbna ban pynrung da ki kot pule jong ka National Council of Educational Research and Training (NCERT) ban sa pyntreikam da ka Meghalaya Board of School Education (MBoSE) na ka bynta ki khynnah skul kiba pule ïa ka Class I haduh Class-X naduh u snem 2024.
Ha ka jingïakren bad ki lad pathai khubor hadien ba la wai ka jingïalang Kynhun Myntri, u Myntri Rangbah Conrad K. Sangma u la ong, “ngi la mynjur ïa ka jingtyrrwa ban pynrung ïa ki kot pule NCERT kum ka jingpynkylla thymmai ïa ki katto katne ki sobjek ïa kaba yn sa leh da ka MBOSE naduh mynta.”
U la ong ba ka jingpynrung ïa ki kot pule NCERT kan long naduh ka Class-I haduh Class-X bad kane kan sdang naduh u snem pule ha u snem ban wan.
U Sangma u la ong ba ki don katto katne ki skul kiba hikai da ki ktien lajong, naduh Class-1 haduh Class-V, hynrei da kane ka jingpynbeit thymmai yn sa wanrah ruh ha ka jingpynkylla ha ka ktien.
“Tang shu dep ka jingpynkylla ktien, yn sa pynrung noh mardor,” u la ong.
U Myntri Rangbah u la ong ba kane ka long kaba donkam namarba ka Sorkar ka sngewkhia ïa ka jinglong jingman jong ka pule ka dangle baroh kawei.
Ïa ka rai la shim hadien ba la pynlong ïa ka jingtih bniah bad ka jingïasyllok bad ki kynhun bapher bapher halor ka pule ka dangle.
“Hadien ka jingïasyllok ngi la poi sha ka rai ba ki kot pule kiba la pyndonkam ha ka MBOSE khamtam haba bishar ïa ka sobjek Science, English bad Mathematics, ki kot kim long kiba ïaryngkat kyrdan bad kiwei pat ki skul kiba shabar ka jylla bad namarkata ban pynjanai ïa ki kot pule, ngi la pdiang ïa kane,” u la ong.
“Ha kaba ïadei bad ka jingpule ha ka Elementary, ki kot pule kiba ngi pyndonkam mynta kim long kumjuh bad namar kata ban wanrah ïa kajuh ka jingïadei ha ka pule ka puthi ha ka National Level, ngin hap ban pynkylla ïa ki kot pule bad ka jingpynkylla ïa ki kot pule kan pynduna ruh ïa ki kot pule ba la pyndonkam ha ki Class bapher bapher,” la ong u Sangma.
Katkum ka jingong jong u, hapoh ka MBOSE ïa mynta na ka bynta ki Class I, II bad III, ki don haduh 11 tylli ki kot pule hynrei ynda la pyndonkam ïa ki kot ka NCERT, ki kot pule ki don tang saw tylli.
“Namarkata, kan don ka jingduna kaba khraw bha ha ka jingdon jong ki kot pule ban sa pyndonkam. Kan don ruh ka jingkiew bad ka jingpynbha ïa ki jingthoh ban sa ai sha ki khynnah skul. Kan long kumjuh sha baroh ki khynnah skul ha ka National Level,” u la bynrap.
Shuh shuh u Myntri Rangbah u la ong ba la leh ïa kane khlem da klet noh ïa ki lynnong pule kiba ïadei bad ka jylla kiba ïadei bad ka kolshor, ka pakit ki mynnor jong ka jaidbynriew kim dei ban shah pynjngut noh.
“Ki sobjek ba ïadei bad kine ki jingpule, ngin sa shimkhia bha ban pdiang ïa ki jingthoh jong ka NCERT bad ngin sa pynmih pat da ki kot lajong hynrei ïa ki jingthoh yn sa bud katkum ki kyndon jong ka NCERT,” u la bynrap.
U la ïathuh ruh ba ka DERT bad ka MBoSE bad ki nonghikai kynthup ruh ïa ki skul bapher bapher kin hap ban ïaid lang ryngkat bad kine ki rai ba la shim.
