19.9 KLUR PYNLUT KA SORKAR BAN MARAMOT ÏA KA JINGKIENG
Shillong, Naitung, 29: Ka Sorkar Jylla ha ka Lah Sngi u Blei ka la pynbna paidbah ba la pyllait ïa ki kali ban ïaid lyngba na baroh arliang ha jingkieng Damsite hadien ba ka jingmaramot ïa ka jingkieng ka ladep pura nadong shadong. Ka jingpyllait ïa ka jingïaid kali kan sdang naduh ka por 6:00 baje mynstep sngi Baar.
Ïa kane la pyntip da u Myntri ka Sorkar Jylla uba khmih ïa ka tnat Sam Bording u Abu Taher Mondal ha ka jingïakren bad ki lad pathai khubor.
Ka Sorkar ka la shim ruh ïa kane ka rai, ha ka jingïalang pyrkhat kam ba la khlieh da u Symbud Myntri Rangbah u Bah Prestone Tynsong, ryngkat ka jingdonlang jong u Chief Secretary u Bah DP Wahlang, ka DGP ka Kong Idashisha Nongrang, ki Deputy Commissioner na ka East Khasi Hills bad Ribhoi District ki ophisar na ka tnat PWD (Roads), MeECL bad ki Consultant na ka IIT Guwahati.
“Ngi la don ka jingïathir sani bha bad ngi la rai ban pyllait noh ka jingïaid kali na baroh arliang surok naduh lashai sngi. Watla katta, ka hukum ba la pynmih dang shen ban pyrkhing ïa ki kali kiba kit khia palat 4 metric ton shaneng kan dang treikam beit,” la ong u Mondal.
“Ka jingmaramot ïa ka jingkieng ka ladep pura bad lada donkam ban dang maramot biang sa shisien ngin sa peit hynrei ïa mynta ka jingmaramot ka la dep,” u la ong bad bynrap, “watla ki dang don khyndiat khynsoit ki jingmaramot barit baria ïa ka jingkieng hynrei kane kan ym ktah pat ïa ka leit ka wan jong ki kali.”
Haba kylli, u Mondal ula ïathuh ba ka jingpynlut pisa ha kaba maramot ïa ka jingkieng ka la kot haduh 19.9 klur tyngka.
Shuh shuh u la ïaiban ba ïa mynta hi la pyllait beit thik tang ïa ki kali rit ban ïaid lyngba ka jingkieng damsite katba ïa ki kali heh yn ym shah satia ban ïaid lyngba.
U la ïathuh ruh ba nangne shakhmat yn sa pyndait noh da ki jingker ha kaba ki kali heh kiba kit palat pud kin ym lait satia ban ïaid lyngba ka jingkieng damsite.
Kum ban shu pynkynmaw hangne, ka jingsdang ban maramot ïa ka jingkieng Damsite ka la sdang naduh ka 14 tarik Nohprah, 2023.
