Shillong, Nohprah, 19: Kum shi bynta ka jingpyntreikam ïa ka National Education Policy, 2020 (NEP), ka Kynhun Myntri jong ka Sorkar Jylla ha ka sngi Thohdieng ka la mynjur ïa ka State Curriculum Framework khnang ba ki khynnah rit kiba dang pule ïa ka Pre-nursery haduh Class-1 kin hap ban pule ïa ki dak thoh ha ka ktien Khasi bad ïa ki dak thoh ha ka ktien Garo.
Ha ka jingïakren bad ki lad pathai u Myntri Rangbah ka Jylla u Conrad K Sangma u la ïathuh ba kane kan treikam naduh ka samoi pule jong u snem 2026 ha baroh ki skul kiba don hapoh ka jylla Meghalaya baroh kawei.
“Ka kynhun myntri ka la mynjur ïa ka State Curriculum Framework ban ai jinghikai ïa ki khynnah naduh ba dang rit ka rta, ha kaba ïa ka Syllabus la ai jingmynjur ban pyndonkam naduh Pre-school haduh Class-I bad nalor kata la mynjur ruh ban pynrung ïa ki kot pule bapher bapher,” ong u Sangma.
“Nga shu kwah ban ïaiban ïa kane, ba ka jingmut ka long ba ha kito ki kyrdan ba dang sdang, ngi pyrshang ban pynleit jingmut ha ki bynta ban saiñdur. Ngin pynleit jingmut ha ka kolshor bad ka histori jong ka jylla bad ngin pynthikna ruh ba kan long kaba donkam na ka bynta uwei pa uwei u khynnah ba un dup nang ban pule ïa ka ktien Khasi bad ïa ka ktien Garo ha ki skul,” u la bynrap.
“Ngi kwah ba uwei pa uwei u khynnah un nang ïa baroh ar tylli ki jait ktien bad kumta ïa kane ruh la pynrung bad pynbeit ruh ïa ka rukom treikam bad pynsuk ïa ka khnang ba kan kham pynsuk ïa ki khynnah ban shim ïa ki bynta ba kongsan jong ka jinghikai kaba ki kwah ban ïoh,” la ong shuh shuh u Sangma.
U la ïathuh ba ki la don napdeng ki skul kiba ladep ban mynjur ïa ka Syllabus na ka bynta u snem pule ban wan.
“Mynta u snem ngim shym la pynlong kongsan ïa kane ban pule baroh ki kot pule ïa kiba ngi la tyrwa na ka bynta u snem ban wan, hynrei mynta u snem ngi la aiti ha ki skul ba ki lah ban jied ïa ki sobjek,” u la ong.
