Shillong, Naitung 28: Dang shen ka United Democratic Party (UDP) ka la pynpaw ïa ka mon ba ka kwah ban kynthup lang ïa ka Voice of the People Party (VPP) ha ka kynhun Regional Democratic Alliance (RDA) mynta sa ka Hill State People’s Democratic Party (HSPDP) ka la pynpaw ïa kajuh ka mon.
U President jong ka HSPDP u Bah KP Pangniang u la ïathuh ba la thaw ïa ka RDA da kawei ka jingmut ban pynïatylli lang ïa ki seng riewlum hapoh ka jylla.
“Ngim pat phah ktien eiei sha ka VPP hynrei ngi ju ïai kyrpad bunsien ïa ki seng saiñpyrthei riewlum ba thymmai ban wan pynïasoh bad ban ïatreilang hapoh ka shatri jong ka RDA. Ngin da sngewkmen shi katdei eh lada ka VPP bad ka KHNAM kin wan lang sha ka kynhun,” la ong u Bah Pangnïang ha ka jingïakren bad ki lad pathai khubor ha ka sngi Saitjaiñ.
U la ong ba ka UDP bad ka HSPDP kin dang ïai bteng ban trei shitom ruh na ka bynta ban pynïatylli ïa ki seng riewlum.
Katkum ka jingong jong u Bah Pangniang, ki seng riewlum kim pat ïohlad satia ban thaw ïa ka Sorkar ha Meghalaya.
“Nga thikna ba lada ngin ïatreilang (kum ki seng riewlum), ki paidbah jong ka jylla kin sa bynshet ha ngi ïa ka jingkitkhlieh ban ïalam ïa ka jylla,” ula ong.
“Wat ka BJP ruh ka donkam ïa ka jingkyrshan jong ki paralok ban thaw ïa ka sorkar ha Delhi. Ka INDIA Block ruh ka don ïa ki paralok kiba ïatreilang ha ka Liang Pyrshah,” u la ong.
Haba jubab ïa ka jingkylli, u Bah Pangniang u la ong ba kam don jingeh lada ki paralok ba ïatreilang kin ïakhun pyrshah iwei ïa iwei pat ha ka elekshon. “Ngi lah ban ïatreilang ynda la kut ka elekshon ban pynurlong ïa ki Common Agenda,” u la bynrap.
U la ong ba ka UDP bad ka HSPDP ruh ki la ïakhun pyrshah ha ka elekshon MDC 2019 hynrei hadien ka elekshon ki la ïatreilang ban thaw ïa ka Executive Committee.
U President ka HSPDP u la ong ba ka thong ba la thaw ïa ka RDA ka long ban ïatreilang na ka bynta ki mat bakongsan jong ka jaidbynriew. “Ïa kane lah ban jop tang lada ki seng riewlum ki wan lang hapoh kawei ka shatri ban ïatreilang hapoh ka jylla,”la bynrap u Bah Pangniang.
Dang shen u President rangbah ka UDP u Bah Metbah Lyngdoh u la ong ba ka long kaba donkam ïa ki seng riewlum ban ïatreilang bad pynpaw ruh ba ka RDA ka kloi ban pdiang ïa ka Voice of the People Party lada ka mynjur khnang ban wanrah ka jingïatylli jong ki seng riewlum hapoh ka jylla.
