Shillong, Naitung 18: U Bah Jokin Kurkalang, ba la 50 snem ka rta, na ka shnong Mawkriah, Mawphlang, bad u Bah Khlaiñbor Pale, ba la 57 snem ka rta, na ka shnong Umkei, Umsning Ri Bhoi District, ki la shah pynkup burom da ki syrnot, ki memento, bad ka khusnam pisa na ka daw ba ki la noh synniang halor ka kam ri dohkha ha ka jylla ha ka jingrakhe ïa ka sngi National Fish Farmers Day 2024 ha ka 10 tarik mynta u bnai, 2024, hapoh ka Directorate of Coldwater Fisheries Research, Bhimtal, Uttarakhand bad ka College jong ka Fisheries, CAU (I), Tripura, kaba long ka jingsarong ïa ka jylla Meghalaya bad ka tnat Fisheries.
U Bah Jokin Kurkalang u la ïoh ïa ka khusnam “Progressive Fish Farmer Award” na Meghalaya ha ryngkat lang bad kiwei pat ki 5 ngut ki nongri dohkha na ki jylla ka Himalaya hapoh ka Directorate of Coldwater Fisheries Research, Bhimtal, Uttarakhand. Da ka jingkyrshan jong ka Blue Revolution scheme, u la leh trei ïa kane ka kam ban ri dohkha katkum ka juk stad saïan hapoh ka pung jong u kaba heh 1-hectare, ha kine ki 5 snem ba la leit da ka jingpynmih dohkha kaba 3,000 kilo.
Katba u Bah Khlaiñbor Pale u la shah pynkup burom da ka “Best Fish Farmer” na Meghalaya ha ryngkatlang bad kiwei pat ki nongrep kane ka thaiñ shatei lammihngi ba la pynlong da ka College of Fisheries, CAU (I), Tripura, ha ka jingïatreilang bad ka North East Society for Fisheries and Aquaculture (NESFA), India. Kum uwei na ki nongri dohkha ba la aiti ha ka kam, u Bah Pale u la pyni ïa ki jinglah jong u ban pynleit jingmut ha kane ka kam khamtam ha ka Aquaculture naduh u snem 2019 ba la kyrshan da ka Blue Revolution Scheme, bad ka jingpynlut ruh nalade. U la lah ruh ban jop ha kane ka kam ri dohkha da kaba lah ban pynmih haduh 2,600 kilo ha u snem 2022, 2,800 kilo ha u snem 2023, bad 2,400 kilo ha u snem 2024.
