Shillong, Nohprah, 01: U MLA ka North Shillong Constituency u Bah Adelbert Nongrum ha ka Lah Sngi u Blei u la ong ba haduh mynta hi u dang kheiñ ïalade ba u dang dei hi u MLA bapura jong ka Voice of People Party (VPP) watla ka party dang khyndiat bnai ka la sospon ïa u na ka jinglong dkhot hadien ka elekshon MDC kaba la long ha rilum Khasi bad ha rilum Jaiñtia.
Halor ka jingmih ki khubor hamsaïa ba u lah ban leit pynïasoh noh sha ka National Peoples Party (NPP) u Bah Nongrum u la ong, “nga sngew sammut ïa kata ka khubor hamsaïa. Ha ka por ba nga la mih na ka KHNAM kiba bun ki la khmihlynti ba ngan leit pynïasoh sha ka Congress ne sha ka BJP hynrei mynta ruh kumjuh bad nga ngeit ba ka por hi kan sa batai.”
“Kumno kata ka jingkylli ka mih haba nga dang kheiñ ïalade ba nga dang dei hi u dkhot ba pura jong ka VPP,” la ong u Bah Nongrum ha ka jingïakren bad ki lad pathai khubor.
“Ar bnai mynshwa nga la pyrkhat ban leit (ujor) sha iingbishar pyrshah ïa ka shithi ba la sospon ïa nga na ka party hynrei haduh mynta hi ngam shym la kheiñ ïa lade ba nga la shah sospon na ka party hynrei ka rukom sospon ïa nga na ka party ka long kaba shu sah ha ka lyngngoh,” u la ong bad bynrap, ‘ai ka por hi kan sa batai bad ngam lah ban sngewthuh ba balei ki shim ïa kata ka rai khlem da khot ïakren ïa nga.”
“Ha lade hi nga shim ba nga la shah sospon na ka party bad wat u Lamphang jong ka Iingdorar Thawaiñ ruh u dang ithuh hi ïa nga kum u MLA bapura jong ka VPP,’ ong ruh shuh u Bah Nongrum.
Ha kaba ïadei bad ka jingphah jingthoh jong ka VPP sha ka Sorkar ban pynlong ïa ka jingtohkit kaba bniah halor ka jingpyntreikam ïa ka MLA Scheme ha ka jylla baroh kawei, u Bah Nongrum ula ong, “ai ba ki paidbah jong ki Constituency hi kin rai bad nga ruh nga dang pynkhreh halor kane ka mat ha ka rynsan kaba dei.”
