Shillong, Nailur, 24: Ka tnad Custom ha ka sngi Saitjaiñ ka la iohkem ïa lai ngut ki snar nongkhaïi ksiar tuh na nongbah Shillong bad ïoh kurup ïa ki biskit ksiar bar ri kiba shongdor haduh 1 klur.
Ka tnat Custom kaba la ioh jingtip kaba thikna halor ka jingkhaïi tuh ïa ki Biskit ksiar bar ri lyngba ka khappud India-Bangladesh na Meghalaya lyngba kawei ka kali na Guwahati, ki ophisar jong ka ophis u Commissioner of Custom Preventive (CCP), Shillong, ki la ïoh bat ïa kawei ka Mahindra XUV 500 ha ka step sngi Sajtiaiñ na Jhalupara, Shillong. Ha kane ka kali u don uwei u briew uba na Rangia, Assam watla u dei uba na West Bengal.
U snar nongkhaii ksiar tuh, ha ka jingtohkit, ula phla ba ia ksiar bar ri la pynpoi na ka ri Bangladesh ka dang don bad u bad markumta ki Ophisar ka Custom ki la khynra bad ïoh kurup 14 tylli ki biskit ksiar ba la song ha ki artylli ki bek plastik.
Kine ki biskit ksiar ki don ka jingkhia kaba 1632.450 gram bad ki shongdor 1,01,78,326 klur tyngka, ong u kyrwoh na ka CCP.
Hadien kane, ki ophisar ka Custom ki la ïoh jingtip sa ïa uwei u briew uba donkti lang bad uba la aiti ïa ki hynniew tylli ki biskit ksiar bad ha ka jingbuddien marmar, ki ophisar ka CCP ki la ïoh bat ïa une u briew na Jhalupara. Une ula phla ba u la leit shim ïa ki ksiar na kawei ka Kynthei ha ka dukan kaba don ha ïewduh, Shillong.
Ha ka jingtohkit bniah ïa kane ka dukan, la ïoh ban kurup ïa ka pisa 9.5 lak tyngka kaba dei ka pisa ba la thied ïa kine ki biskit ksiar. ïa kane ka pisa ruh la kurup noh da ka Custom.
Ha ka jingtohkit ïa kane ka Kynthei, la shem ba ïa kane ka ksiar la pynpoi tuh na khappud ka Indo-Bangladesh.
Lai ngut ki briew ki la shah kem bad ka jingtohkit mynta ka dang ïaid shakhmat, ong u kyrwoh na ka CPP.
Dang ha u bnai ladep, ki Ophisar ka CCP, Shillong ki la ioh kurup 5 tylli ki biskit ksiar kiba don ka jingkhia 582.70 gram, na uwei u briew hajan Jorabad. ïa une u briew la ïoh bat na kawei ka Maruti Car.
Ïa ka ksiar la pynpoi na Bholaganj kaba don ha khappud Indo-Bangla. Ha ka jingbuddien marmar la hiar khynra ïa ka ïing ha Lumpariang, kaba dei ka jaka ba leit shim ïa kane ka ksiar, la ïoh kurup ïa ka pisa India ba T. 3.96 klur ïa kaba la ngeit ba ka dei ka pisa ba die ïa ka ksiar.
Ka jingtohkit ïa kane ka jingjia ruh ka dang ïaid shakhmat.
Ka CCP ka la iathuh ba ka tnad Custom ka la buh thong hakhmat ban ïakhun pyrshah ïa ki kam shalan beain ha khappud naduh ka jingkhaïi drok, sikret, ki mar jong ki mrad khlaw, ka pisa thok bad kiwei kiwei.
Ka CCP ka la kular ruh ban buhrieh bha ia ka kyrteng jong ki nongai jingtip bad yn sa ai ruh bad ka khusnam kaba lait na ka jingsiew khajna sha ka Income Tax.
