Shillong, Nailar, 18: Hadien ba ka Karbi Anglong Student Association (KSA) ka la kren sha ki lad pathai khubor ha ka sngi ba ki Regional Committee jong ka Sorkar Assam bad Meghalaya ki la leit ban ia kynduh ha ki thain khappud jong ki ar-tylli ki Jylla ha Khanduli ha ka 16 tarik u Nailar 2023, ki nongialam ka KSA ki la byrthen ba kan long kum ha Manipur lada ki duh noh ia ki jaka ki puta kiba ki kam ba ki dei ki jong ki.
“Na ka liang ka Seng ngi kwah ban pynpaw ba ki paradoh parasnam ki jong ngi kim dei ban duh ia ki jaka ki puta kiba dei ka hok ka kynti ka jong ki, ngi kren shai ba shi inshi ngim kwah ki jong kiwei bad shi inshi ngim dei ban duh ia ki jaka ki puta ki jong ngi,” ong u kyrwoh ba la phah da u Publicity Secretary ka KSU West Jaintia Hills Unit u Samla Juhhi Tariang.
“Ka sorkar Meghalaya ka dei ban shimkhia ia ka jingbyrthen ka KSA halor ka kam ia pynbeit pud namar ki ong ba kin pynkylla kumba jia ha Manipur. Ngi pdiang sngewbha bad ngi long kiba la kloi ban tyngkhuh bad ngim shym la bythen hynrei lada ki sdang hi ngim dei ki matlah bad ki kyllut,” la bynrap u kyrwoh.
“Na ka liang ka Seng kan iai don barabor bad ki nongshong shnong kiba don ha ki thaiñ khappud bad lada jia ei ei kiba sdang kin hap ban shim ia ka jingkitkhlieh,” la ong u Kyrwoh na ka KSU.
