Shillong, Naitung, 31: U Commisioner & Secretary jong ka tnat Pule Puthi ka Sorkar Jylla u Vijay Kumar Mantri da lade hi ha ka janmiet sngi Balang u la leit ban ïakynduh markhmat ïa ki nongtrei jong ki skul Samagra Shiksha Abhiyan (SSA) kiba don hapoh ka shatri jong ka All Meghalaya SSA Non-Teaching Staffs Association (AMSNSA) kiba la sdang ïa ka jingïakhih kaba khlem pud sngi da kaba shong kyllaiñ myngngor ha madan Malki, Shillong.
Kane ka jingïakhih ka long ban dawa ïa ka Sorkar Meghalaya Democratic Alliance (MDA) ba ïalam da ka National Peoples Party (NPP) ba kan pynkiew noh ïa ka tulop sha ka 80 percent na kaba ki ïoh mynta, nalor ka 2 percent katkum ka jingshakri ba la kham slem ha ka kam bad sa 5 percent ban pynkiew ïa ka tulop ne ka Increment.
U Mantri ha u kyrwoh ba la phah sha ki lad pathai khubor u la ong, ‘nga la leit ban ïakynduh ïa ki bad nga la sngap ruh ïa ki jingeh jong ki. Ïa ki jingdawa jong ki, nga la pynsngew sha u Myntri Rangbah ka Jylla. Lashai ka sngi Palei u Myntri Rangbah
un sa lum ïa ka jingïalang ba kyrkieh bad ki ophisar ban ïathir ïatai bad ban shim rai halor ka jingdawa jong ki (nongtrei ki skul SSA).”
“U Myntri Rangbah u la kren ruh ïa ki (nongïalam) lyngba ka telephone bad u la pyntip ïa ki ba ka Sorkar kan sa pyrkhat halor ka jingdawa jong ki,” la pyntip u Mantri.
Shwa kane, ka President jong ka Association ka Kong Jennifer Synrem ha ka jingïakren bad ki lad pathai khubor ka la ong ba kane ka jingïakhih jong ka seng ka long hadien ba ka Sorkar kam shym la sngap satia ïa ki jingud jingnam namarba la phra snem kynthih ka jingsiew ka ïaineh kumjuh katba ki marbam mardih ki la nang kiew na ka sngi sha ka sngi.
“Ka jingïakhih ka long ban dawa ïa ka Sorkar ba kan pynkiew ïa ka jingsiew tulop kaba la dei ban siew kaba la kot haduh phra snem bad ka Sorkar ka la jubab da kaba ong ban siew 25%. Hynrei ngim treh ban pdiang ka 25% bad dang shen ha ka jingïalang ngi la shim ïa ka rai lada ka Sorkar kam ai ïa ka 80% ngin kyntait,” ka la ong.
Shuh shuh ka la ïathuh ba ka jingdawa jong ka seng ban pynkiew tulop ka la long naduh u snemn 2023 hynrei ka sorkar kam shym la pynsngap satia.
Ka la ong ruh katba ka Sorkar kam pat lah ban pynurlong ïa ka jingdawa ban siew ïa ka tulop kaba kot 80% ka seng kan ym pat pynsangeh satia ïa ka jingïakhih kaba khlem pud sngi.
U MDC ka Sohra Constituency u Bah Titostarwell Chyne ha kane kaju ka sngi u la leit jngoh ïa kane ka kynhun bad ïathuh ruh ba un sa leit hi dalade mynta ka sngi sha Secretariat ban ïakynduh markhmat ïa u Myntri ka tnat Pule Puthi u Rakkam A. Sangma ban pynsngew ïa kane ka jingdawa jong kine ki nongtrei jong ki skul SSA bad ong ruh ba lada ka jingïakhih kan dang bteng kan ktah ruh ïa ka treikam treijam ha ki ophis jong ki skul SSA bad ïa ka ing ka sem ka jong ki.
