Shillong, Jymmang, 26: U Chief Executive Member (CEM) jong ka Khasi Hills Autonomous District Council (KHADC) u Bah Titostarwell Chyne u la ïathuh ba ka Executive Committee jong ka Council kan sa phah da ka jingthoh sha ka ophis u District Transports Officer (DTO) ka East Khasi Hills District ban phah pyndam lut ïa ki Driving License jong ki nongñiah kali bar jylla kiba buh kali kamai bad ïa kiba ñiah kali kamai khlem da ïoh ïa ka Trading License bad ïa ka Labour License na ka District Council.
Ka District Council ka la phah khynra naphang ha ki Pulit ka tnat Enforcement ïa ki nongñiah kali kamai bar jylla ha ki hynñiew tylli ki Zone hadien ka jingdawa jong ka East Khasi Hills Local Taxi Welfare Association na ka jingshah shoh pynmynaw jong ki arngut ki nongñiah kali kamai dang shen ha Khyndai Lad, Shillong ha ki san ngut ki bar jylla kiba la shah kem mynta ha ki Pulit ka Shillong Sadar Police Station.
Ha ka jingïakren bad ki lad pathai khubor ha ka sngi Thohdieng, u CEM ka KHADC u la ïathuh, haduh mynta ka tnat Enforcement ka dang ai kaiphod tang na ki lai tylli ki Zone halor ka jingdon jong ki nongñiah kali bar jylla ki bym don ïa ka Labour Licence bad ïa ki kali kamai jong ki bar jylla ki bym don ïa ka Trading License.
“Ki don hynñiew tylli ki Zone, hynrei haduh mynta ngi dang ïoh jingkheiñ tang na ki 3 tylli ki Zone,” ong u Bah Chyne.
“Ha ka Lah Sngi u Blei jong ka taïew ban wan, ngan sa lum jingkheiñ katno tylli ki local taxi kiba ïaid khlem ka Trading License, ki nongñiah kali bar jylla kiba ñiah kali khlem ka Labour License, ïa baroh ki kali ba la ïoh registration number ba biang bad ngin sa thoh sha ka ophis jong ki DTO. Kam lah ban long ban shu ïaid khlem ka laisen bad ngin sa shimkhia bha ïa kane ka kam. Ka ophis jong ki DTO ka dei ban pyndam ïa ki trai kali bad ïa ki nongñiah kali bar jylla kiba shu leh be-aiñ,” ong u Bah Chyne.
“Mynta ka sngi, nga la bthah ïa ki nongtrei ban ym ai laisen ïano ïano ruh katba ngim pat pynmih ïa ka hukum,” u la ong.
U CEM u la ong ba kito ki nongaikam ki dei ban da pyndap da ka Form bad ban shim ruh ïa ka jingkitkhlieh (Undertaking). “Mynta nga la ai hukum ba dei ban shim ïa ka Residential Certificate jong ki nongñiah kali bar jylla khnang ban pynshisha ki wan nangno bad ki sah hangno,” u la bynrap.
Katkum ka jingïathuh jong u Bah Chyne, haduh mynta ka tnat Enforcement ka dang ai jingkheiñ tang na ka thaiñ Red Cross, Laitumkhrah, Dhankheti, Malki, Barik Point, Polo, Golflink bad Nongmensong.
