Shillong 26 Jymmang : Ka Khasi Students’ Union lyngba ka Education Cell jong ka, ka la leit ban ia kynduh ia u Ambrose Ch Marak u Secretary jong ka tnat pule puthi ban ia kren bad ai jingthoh halor ka jingeh ba ki samla pule ki ia kynduh ha PGT College haduh ba kin hap ban ieng lain shiteng synnia ruh ban ap ia ka Form. Ka KSU ka la dawa ba dei ban pynjlan biang ia ka tarik ai Form bad ban pynbun ia ki Form khnang ba baroh ki samla pule kin ioh ban iakhun ban ioh pule ha katei ka College. U Ambrose Ch Marak u la kular ban leh kumta bad u la phone ruh wut wut sha ki nongpyniaid jong ka College ba ki ban pynbun ia ki Form.
Ka KSU ka la ia kynduh ruh ia I Principal jong ka PGT College ba nangne shakhmat ki dei ban pyllait noh beit online ia ka Form katkum ka jingiaid jong ka juk. Ha kaba iadei bad ki Centres na ka bynta jong kito kiba hap ban thoh ia ka CUET, ka Seng ka lah dawa ban pynthikna ba ki samla Khasi ki dei ban ioh thoh beit ha Shillong namarba kumba ka long mynta kiba thoh eksam ia ka CUET ki hap ban thoh shabar jylla. Halor ka jingiatyngkhuh ki tarik ban thoh ia ka eksamin jong ka D.El.Ed bad ka B.Ed u Ambrose Ch Marak u la kular ban pynkynriah noh ia ka sngi bad yn sa pynbna paidbah ia ki sngi ba dei ban thoh eksamin. Kane ka long katkum ka kyrwoh ba la phah da u Education Secretary ka KSU u samla Pynkmen Sanmiet.
